Morrió l’académicu Emilio Barriuso

L’Academia de la Llingua ta acabante de dar anuncia del fallecimientu del so académicu de númberu Emilio Barriuso Fernández. Estudiosu del léxicu marineru asturianu, foi autor d’obres como “La lengua marinera de Asturias” (1987) y “Atlas léxico marinero de Asturias" (2000). Yera miembru de l'Academia dende l’añu 1989 y tamién del Real Instituto de Estudios Asturianos.

Emilio Barriuso Fernández yera Doctor en Filoloxía Románica pola Universidá d'Uviéu y Caderalgu de Llingua y Lliteratura Española nel Institutu de Siero. Entró como miembru correspondiente de l'Academia de la Llingua Asturiana nel añu 1989. En 1994 sería nombráu académicu de númberu. Asimesmo yera dende l'añu 1986 miembru del Real Instituto de Estudios Asturianos.
 
El funeral va tener llugar esti vienres 30 de xineru a les 13:15 hores na Ilesia de San Xuan el Real d’Uviéu.

Dende Asturies.com queremos dar el más sinceru pésame a los familiares y amigos, a la vez que llamentamos la perda d’un home que tanto fixo pola llingua y cultura d’Asturies.