Los sindicatos d'enseñanza critiquen la eliminación del asturianu de los nuevos estudios de Maxisteriu

|

Los sindicatos Suatea, CC.OO, FETE-UXT, ANPE y CSIF, criticaron güei que la "direición de la Escuela de Maxisteriu dexe fuera de los nuevos planes d'estudiu que se diseñen p'adautase al Plan Européu de Bolonia a la llingua asturiana y a la educación musical".

Al traviés d'un comunicáu, les cinco centrales acusaron a la direición de la Escuela de pretender "que s'aprueben cola mayor urxencia los cambios, hasta'l puntu de que la votación de la Xunta Xeneral de la Escuela de Maxisteriu va ser mañana, día 29 de xineru del 2008".

"Col plan Européu de Bolonia", esplica la nota, "en Maxisteriu s'espedirán dos titulaciones xenériques: Infantil y Primaria". "Caúna d'éstes", añade, "va dir acompañada d'una 'mención', que se diba corresponder, más o menos, colo que nesti momentu entendíemos como especialidaes". Según el comunicáu, "una vez algamada la titulación se podíen prosiguir estudios de postgráu mediante 'máster'", dándose la situación de que "nestos tampoco figuren les especialidaes citaes".

Los cincos sindicatos denuncien la "reducción d'especialidaes hasta'l puntu d'entrugase si va haber que recurrir a profesores xeneralistes pa impartir música o llingua asturiana".

 

Contador Estadistiques