Gatos del fornu y Ciquitrinos celebren el cumpleaños de los Alcuentros de Trebolgu

|

Acabantes de sacar discu los dos grupos de folk asturianu Gatos de Fornu y Ciquitrinos, nun van esperar a la primavera pa entamar la xira conxunta de la que daben anuncia na presentación de los sos respectivos discos. Gastronomía y música asturiana son la xuntanza que proponen les dos bandes pa esti entamu de xira, y asina festexar de pasu los diez años de vida de los Alcuentros de Trebolgu. La fiesta de cumpleaños va ser nel conceyu de Santu Adrianu, onde la música asturiana suel topar abellugu n'El Sabil, establecimientu hosteleru del llugar qu'organiza bien d'actividaes musicales a lo llargo del añu.

El formatu de xira conxunta, na que dos grupos ufiértense como un paquete musical, ye daqué novedoso nel folk asturianu. La idega ye que le dos bandes caltengan la so independecia nes actuaciones, pero que sí haya dalgo de complicidá musical nel escenariu. Ello ye que cada grupu va facer una versión d'un tema del otru, y a lo cabero del conciertu los dos fadrán un tema en comuña. El folk acústicu que busca llamar al baille ye la principal característica que fai de pegamentu pa unir a estos dos grupos, colo que se puede camentar qu'esti matrimoniu folk puede funcionar perbien.

La primer ocasión pa comprobar que tal resulta esta fórmula va ser ya'l próximu sábadu 31. Esi día la música de Gatos del Fornu y Ciquitrinos va sirvir pa festexar el cumpleaños de los Alcuentros de Trebolgu, que faen el so décimu aniversariu. Los Alcuentros de Trebolgu lleven dende l'añu 2000 xubiendo enriba del escenariu a nomes de muncha sona na escena folk d'Asturies y fuera d'Asturies. La organización de los Alcuentros de Trebolgu cntó a lo llargo de toos estos años col trabayu intensu y desinteresáu de los miembros de l'asociación que da nome a los alcuentros, "Trebolgu". Como resultáu d'esti trabayu, l'asociación foi quien a afitar esti festival y convertilu en referente y fecha esperada polos aficionaos a la música folk n'Asturies. Pal décimu aniversariu los trebolgos van salir del so"mediu natural", Uviéu, y van apagar les veles de la tarta n'El Sabil establecimientu hosteleru que ta nel conceyu de Santu Adrianu. Ellí, arriendes de la música de Gatos del Fornu y Ciquitrinos, tamién se va poder disfrutar d'una cena degustación de gochu asturcelta, colo que nun hai dubia de que'l productu asturianu va ser el protagonista de la nueche, tanto'l qu'entra pela boca como pela oreya. Pa más información llamar al teléfonu 985761472.
 

Contador Estadistiques