Ilegales despídese d'Asturies con casi trés hores de conciertu

|

Los Ilegales yá nun van tocar más n'Asturies. "Nun ye una traxedia, namás ye'l final". Polo menos eso dixo Jorge Martínez ayeri, antes de los bises. Muncha xente nun lo cree. Pero por si acasu va ser verdá, naide quiso perdese la teórica despidida.

A eso de los once y media, les gorres y sudaderes de colorinps de los raperos que disfrutaben con SFDK nel escenariu fueron dexando pasu a la pluralidá que siguió a los Ilegales mientres les últimes trés décades: padres, fíos, güelos, punkis, alternativos, heavys, 'pijos'. Toos se dieron cita pa ver la última llamada de Jorge Martínez, Alejandro Blanco y Jaime Belaustegui dende un escenariu asturianu.

 Con 'Yo soy quien espía los juegos de los niños' desamarraron les ganes del personal de velos en directu, y empezó un recital que dexó satisfechos a propios y estraños, con un soníu impecable, y una entrega de los músicos tal, que paecía tratase d'una de les sos primeres actuaciones y non d'una de les últimes. El mesmu 'Jorjón' pegó un par de saltos d'adrenalina y intercambió xestos emocionaos de complicidá colos sos compañeros al acabar algún tema.

La primer parte del conciertu foi la más clásica. El tríu esgranó ellí los más míticos temes del so repertoriu: 'Hacer mucho ruido', 'Tiempos nuevos', y como non, 'Agotados de esperar el fin', mui apropiada pa la ocasión que se presentaba.

La segunda hora'l ritmu baxó, y Jorge tomóse'l so tiempu pa "calecer" y "facer 'chillar'" a les sos guitarres, en temes como 'La Casa del Misterio', 'Enamorados de Varsovia' o 'La Chica del Club de Golf'. Mención especial mereció 'Ángel Exterminador', pa la que recuperó a Juan Flores al saxu y a Xuan Zem a los teclaos y al vibráfonu.

Con 'Vuelven los problemas' o 'Hola Mamoncete' foi recuperándose la marcha más roquera d'un conciertu que, contra tou pronósticu, nun acabó con 'Destruye'. Tres el yá tradicional pupurri de Tiempos nuevos' y 'África Paga', les miles de voces reclamando 'otra' obligaron a subir el telón otra vuelta y dedicar un bis que se prollongó más allá de les dos y media de la mañana, p'acabar con un emotivu aplausu y un inmeyorable sabor de boca en tolos presentes.

¿Toos? Non. Al que se-y ocurrió tirar la botella al escenariu yá s'encargó Jorge d'amarga-y el tragu públicamente, acordándose de los sos seres más queríos. Y ye que dempués de 30 años, el vocalista 'ilegal' sigue siendo un macarra

 

Contador Estadistiques