Blanco garantiza la continuidá de l'Autovía del Cantábricu

José Blanco garantizó la continuidá nes obres de los tramos de l'Autovía del Cantábricu, por cuenta de la revisión que se realizó del "severu axuste" de Fomentu pa cumplir col déficit públicu.

Sicasí, nuna rueda prensa ofrecida n'Uviéu, Blanco nun concretó plazos nin partíes pa la mentada autovía. El ministru de Fomentu fizo estes manifestaciones tres reunise col secretariu xeneral de la Federación Socialista Asturiana (FSA). "Los recursos adicionales van permitir la continuidá de tolos tramos", señaló, antemanando una subida importante nos presupuestos a destinar nel 2011, tanto al tramu asturianu como al tramu gallegu, puesto que'l tramu cántabru va licitase al traviés del réxime concesional y nun va tar suxetu a los Presupuestos Xenerales del Estáu (PXE).
  
Munchos de los tramos van retomar les actuaciones nos próximos díes, según Blanco, lliberándose recursos pa que les obres puean volver a entamar yá esti añu. El ministru de Fomentu matizó, sicasí, qu'existe un tramu, l'Unquera-Pendueles que ta pendiente d'un modificáu de proyectu por condiciones xeotécnicas que surdieron.
  
La posibilidá de recuperar el ritmu n'infraestructures como l'Autovía del Cantábricu surde dempués de que'l Gobiernu ficiere "axustes internos" que-y permiten contar con algo más de recursos p'actuaciones que tienen una "estraordinaria importancia". Sicasí, Blanco señaló qu'igual se xeneraron más mires que los recursos que tán disponibles.
  
Preguntáu poles manifestaciones realizaes pola patronal de constructores asturianos CAC-Asprocom, que señalaron que les obres nun taríen terminaes p'antes de 2014, Blanco reaccionó diciendo: "Eso nun lo saben nin los constructores nin yo mesmu".
  
"Hai que ver la evolución, lo que ta claro ye la voluntá de Fomentu d'acabar la infraestructura lo primero que se puea", comentó. No referente a les partíes, llendóse a dicir que se van ver reflexaes nel correspondiente cuadru de los Presupuestos Xenerales del Estáu.