La reforma llaboral abre una puerta a recortes nel sector priváu

El Bancu d'España considera que la rebaxa de los xornales a los funcionarios podría tener un efectu "demostración" pal sector priváu.

Al empar, apunta que les víes pa facilitar el descuelgue salarial nes empreses con dificultaes qu'ofrez la nueva reforma llaboral "tamién podríen redundar en beneficiu d'esto mesmo".
  
Nel so últimu Boletín Económicu, la institución gobernada por Miguel Ángel Fernández Ordóñez vuelve apostar pola moderación salarial, procesu qu'espera que se prollongue no que resta d'añu, a midida que se vayan firmando los nuevos convenios colectivos, qu'incorporen subíes salariales de sobre'l 1%, inferiores a los de los convenios pluriañales (1,4%).
  
Sicasí, el Bancu d'España va tovía más lloñe. Na so opinión, "les midíes que se tomaron en relación col recorte de los xornales públicos podríen exercer un ciertu efectu demostración sobre los xornales privaos", a lo qu'añede que "l'usu de les víes pa facilitar el descuelgue salarial de les empreses con dificultaes qu'ofrez la reforma del mercáu llaboral en marcha tamién podría redundar en beneficiu d'eso mesmo".
  
El bancu emisor refierse asina al recorte de xornales d'un 5% de media aplicáu sobre los sueldos de los funcionarios incluyíos nel últimu decretu de recortes aplicáu pol Gobiernu p'acelerar el procesu d'axuste del déficit.
  
De la mesma, el boletín indica que la información más reciente sobre la evolución de los costos llaborales muestra que nel segundu trimestre intensificaríase'l procesu de moderación salarial que se reparó a primeros del exerciciu.
  
Los convenios salariales acordaos hasta xunu reflexen un impactu mediu de les tarifes del 1,3% y, en conxuntu, estímase qu'un aumentu de la remuneración por asalariáu del 1%, en combinación col comportamientu "tovía relativamente espansivu de la productividá", favorecería un descensu de los costos llaborales por unidá de productu, sobromanera acusáu na industria.