Zapatero caltién "firme" la defensa de l'actividá del carbón

El presidente del Gobiernu, José Luis Rodríguez Zapatero, señaló esti llunes que'l Gobiernu "va caltener firme la defensa al carbón ante la Comisión Europea".

Amás, apuntó que l'Executivu busca una solución urxente "pa garantizar l'actividá de los problemes que pudiera xenerar a les empreses mineres la decisión de la Comisión Europea".
  
Al respecto, Rodríguez Zapatero destacó que'l Gobiernu va siguir trabayando cola Unión Europea, "puesto que'l procesu, en relación col carbón, tien que dexar l'adaptación de les comarques a una actividá económica alternativa y un procesu nel que se defenda una parte de l'actividá del carbón como fonte d'enerxía".
  
Tamién declaró, mientres la visita que realizó al Centru Especializáu d'Altu Rendimientu d'Atletismu en Lleón, que la Ciudá de la Enerxía de Ponferrada (Ciuden), qu'algama una inversión de 800 millones d'euros, ye una de los grandes proyectos europeos pa facilitar enerxíes alternatives, pa una investigación avanzada del carbón y que cuenta col "gran compromisu del Gobiernu d'España y de la Unión Europea, que ye vital pal futuru económicu y industrial del Bierzo y poro de Lleón".
  
El presidente del executivu realizó estes declaraciones a preguntes sobre l'aplicación del Real Decretu qu'incentiva'l consumu de carbón nacional y cómo afecta la situación a la Ciudá de la Enerxía.