Felpeyu y Corquiéu toquen nel Beltaine

Güei, vienres 30 de xunetu, nel festival celta Beltaine, van actuar Corquiéu y Felpeyu. La cita ye apartir de les 22:30 hores, na Plaza’l Parche d’Avilés.

Felpeyu ye un de los grupos más importantes de música atlántica del país.  Foi fundáu en 1991 en Salamanca por Ígor Medio y Ruma Barbero. Dende entós, desendolcaron una carrera musical con una bayura d'actuaciones per España, Europa y Australia.

El so primer trabayu discográficu foi'l discu homónimu ‘Felpeyu’, editáu en 1994 por Fonoastur. En 1997 apaez el so segundu discu, ‘Tierra’ (Fonoastur) y enxertan una de les sos pieces del discu Felpeyu nel recopilatoriu ‘Naciones Celta’. En 2000 asoleyen ‘Live Overseas’ (Urchin Records), discu en direuto grabáu n'Ourense pa la so xira per Australia, y en 2002 ‘Yá!’.

El 24 de xunu de 2006, el grupu sufre un accidente de tráficu cuando empobinaba dende Asturies pa Cataluña, onde diben ufrir un conciertu. Nel siniestru morrieron los sos componentes Ígor Medio y Carlos Redondo (guitarra), mientres que'l restu la formación -el bodhraneru Ruma Barbero, el curdioneru Xuan Nel Expósito, los vigulineros Lisardo Prieto y Fernando Oyágüez, el gaiteru Diego Pangua y el técnicu de soníu Slaven Kolak-, sufrieron feríes de diversa gravedá.

Tres una temporada d'obligada inactividá, la banda resurde incorporando'l baxu lléctricu nes manes de Dudu Puente, quién tamién-y pondrá voz nuevo al grupu. Más alantre tendría de llegar Moisés Suárez cola guitarra acústica zarrando asina la formación esistente anguañu. N'abril de 2008 asoleyen ‘Canteros’, otra vez cola productora Tierra Discos.

El grupu Corquiéu entama l'andar musical nel añu 1997 en Ribeseya. Nel añu 2000 y tres de tocar abondos conciertos per toa Asturies, el grupu graba dos temes de criación propio nun discu recopilatoriu de grupos asturianos nuevos: “Xeneración folk” col sellu discográficu L'Aguañaz, recibiendo l'aplausu incondicional del públicu.

N'avientu del añu 2001 Corquiéu asoleya'l so esperáu discu ‘La Barquera’ nuevamente col sellu discográficu L'Aguañaz. Nesti discu, Corquiéu amiesta tendencies d'anguaño col so particular estilu folk. Con esti discu, el grupu sopelexa'l so frescor y la so calidá na interpretación, siendo quien a alcontrar un furacu nel panorama folk asturianu. Los conciertos per Asturies y España van de siguío con acoyida cada vuelta mayor.

Nel 2002 Corquiéu participa nel prestixosu Festival Intercélticu de Lorient (Bretaña) faciendo dos conciertos representando a la música folk asturiana y amosando un direuto dinámicu y la so calidá, en teniendo en cuenta la rempuesta del abondosu públicu y la importante venta discos. Hungría, Chequía, Bélxica, Italia, Holanda o Dinamarca son otros de los países onde aportó esti perconocíu grupu asturianu.

Depués del ésitu de ‘La Barquera’, el so primer discu, Corquiéu asoleya ‘Salia’ y ‘Suaña’, espublizáu esti añu. Dellos premios y conciertos per tol mundu, son amuesa del bon facer d’esti grupu.