CAM aprueba la fusión con Caxastur, Caja Extremadura y Cantabria

El Conseyu d'Alministración de la Caxa d'Aforros del Mediterráneu (CAM) dio lluz verde a la fusión fría con Caxastur, Caja Estremadura y Caja Cantabria.

L'organismu que preside Modestu Crespo alcordó la so incorporación al contratu d'integración d'aclaraciones que faen posible que'l bancu resultante seya xestionáu conforme a práctiques de bon gobiernu, indicó la CAM nun comunicáu.

El Conseyu d'Alministración de la caxa valenciana algamó esti alcuerdu en valorando les ventayes que la constitución d'unu de los grupos de caxes d'aforros con mayor fortaleza y proyección d'España va suponer  tantu pa los veceros, como los emplegaos y la sociedá polo xeneral. Ello ye que la SIP va dar llugar al tercer grupu financieru de caxes d'España y el quintu grupu del sector financieru español, con un volume d'activos superior a los 135.000 millones d'euros y un volume de negociu en redol a 160.000 millones d'euros.

Tres esta decisión del Conseyu d'Alministración, l'equipu directivu de la CAM dixo tar "bien satisfechu" pola culminación d'esti procesu "que dexa a la entidá alicantina formar parte d'unu de los SIP más potentes del mercáu financieru español". "El bon faer y la flexibilidá de les caxes participantes fixeron posible un alcuerdu propiu d'una entidá moderna, fuerte, solvente y bien asitiada pa competir nel actual contestu financieru, y que ta llamada a liderar el sector", indicaron dende la dirección de la caxa.

Pela so parte, Modestu Crespo dixo tar "bien satisfechos" col alcuerdu alcanzáu y recordó nuevamente que se van convertir "nel tercer grupu de caxes d'esti país".

RECONDUCCIÓN DE LA SITUACIÓN

El Bancu d'España convocó'l pasáu día 16 una xunta d'urxencia pa tratar esti Sistema Institucional de Protección (SIP) y dio de plazu hasta'l martes pa tratar de reconducir la situación dempués de que'l día anterior el conseyu d'alministración de la CAM aceptara la fusión fría' pero non ciertos aspeutos relativos al Gobiernu corporativu.

En concretu, la caxa valenciana negóse a aceptar la delegación de funciones nel presidente de Cajastur, Manuel Menéndez, qu'ocuparía'l cargu de conseyeru delegáu del SIP. Nesti sentíu, el conseyu de la caxa reafitó la necesidá de que la soberanía que dexen les caxes "recibir y alministre el Conseyu d'Alministración del bancu y, al traviés d'ésti, el Conseyeru Delegáu".

Pela so parte, Caxastur respondió a la CAM que'l contratu d'integración nel Sistema Institucional de Protección (SIP) ente dambes caxes, Caja Estremadura y Caja Cantabria tien d'aceptase en toos los sos términos o se refuga.

Tres estes discrepancies sobre'l modelo de gobiernu corporativu, l'alcuerdu alcanzáu dexa la fusión fría' que la CAM, Grupo Caxastur, Caja Estremadura y Caja Cantabria decidieron crear el pasáu 24 de mayu pa dar llugar al tercer grupu financieru de caxes d'España y el quintu grupu del sector financieru español, con un volume d'activos superior a los 135.000 millones d'euros y un volume de negociu al redor de 160.000 millones d'euros.

RESULTANCIES DE LA CAM NEL PRIMER SEMESTRE

Per otra parte, el Conseyu d'Alministración de la caxa valenciana conoció les resultancies del primer semestre del añu, que la CAM cerró con una resultancia atribuyida al grupu de 103,5 millones d'euros, un 18,6% menos que nel mesmu periodu del añu anterior, en destinando 495 millones d'euros ameyorar les cobertories d'activos vía provisiones, según informó la entidá.

El marxe d'interés del negociu algamó los 474 millones d'euros, asitiándose en niveles previos al entamu de la crisis. Nesti sentíu, la CAM sorrayó que lo "escepcional" que resultó 2009, nel que l'índiz aumentó un 46% interañal por efectu de la evolución de los tipos d'interés.

L'organismu que preside Modestu Crespo ameyoró en 0,1 puntos porcentuales el so coeficiente de solvencia, que s'asitia nel 11,5% y que supón un escesu de capital sobre requerimientos mínimos de 1.790 millones d'euros, un 44%.  Mientres esti semestre, la CAM fortaleció tamién la so estructura de solvencia con un Tier 1 del 9,2%, 0,2 puntos porcentuales percima de xunu de 2009.

Amás, mientres estos primeros seis meses del añu, la entidá siguió calteniendo niveles de morosidá y de cobertoria qu'ameyoren la media sectorial. D'esta miente, l'índiz de morosidá asítiase nel 4,6%, un puntu porcentual per debaxo de xunu de 2009 y 0,5 puntos porcentuales meyor que la media del sector de caxes, ente que el ratio de cobertoria álzase al 81%, 26 puntos meyor que va un añu.

Nel capítulu de lliquidez, les reserves de CAM déxen-y cubrir los vencimientos de delda de los próximos cuatro años, yá que no que resta de 2010 CAM nun tien nengún vencimientu pendiente.

FINANCIAMIENTU DEL BEC

Per otra parte, CAM amenorgó en 2.900 millones d'euros el financiamientu recibíu del Bancu Central Européu (BCE) hasta algamar la cifra de 2.518 millones en xunu de 2010. En Caxa Mediterráneu, el financiamientu del BCE supon un 3,5% sobre'l total d'activos, frente al 4,1% de media de les caxes y el 5,2% de media de los bancos.

El volume de recursos en balance de la entidá asitióse en 65.810 millones d'euros, ente que los recursos minoristes -equivalentes al negociu básicu- esperimenten una medría del 11% y asítiense en 32.938 millones d'euros, con 3.250 millones más que va un añu. Otra manera, reparar un amenorgamientu del 13% nel financiamientu mayorista.

El creitu xestionáu foi de 58.013 millones d'euros, un 4% menos qu'en 2009, magar nel trimestre repicó en 485 millones d'euros. El 69% del creitu ta cubiertu con garantíes reales.

Nesti primer semestre de 2010, la caxa valenciana formalizó 53.317 nueves operaciones de creitu por importe de 3.580 millones d'euros. Caxa Mediterráneu espresó'l so sofitu a les llínees de financiamientu públiques habilitaes pol Institutu de Creitu Oficial (ICO) y pol Institutu Valencianu de Finances (IVF), al traviés de les cual formalizó más de 8.600 operaciones creiticies por importe de 486 millones d'euros.

Mientres esti semestre, CAM siguió desenvolviendo la so política d'eficiencia cola reestructuración de la so rede d'oficines al nuevu escenariu económicu. A xunu de 2010, la rede comercial de CAM componse d'un total de 997 oficines, n'aplicando un amenorgamientu de 94 oficines dende xunu del añu pasáu.

CUOTES PARTICIPATIVES

Dos años depués del entamu de la so cotización en Bolsa, les cuotes participatives CAM siguen amosando un bon comportamientu en comparanza cola media de les entidaes financieres cotizaes. No que llevamos d'añu, la cotización de les cuotes CAM revalorizóse un 10,43%, bien percima de los principales índices bursátiles.

El pasáu 10 de xunu, Caxa Mediterráneu fixo efectivu'l pagu del dividendu complementariu con cargu al exerciciu de 2009 por importe de 0,0891 euros per cuota participativa. Les cuotes CAM incorporáronse dende'l 1 de xunetu al índiz de cotización 'Ibex Medium Cap', qu'axunta valores de mediana capitalización de los cuatro bolses españoles.