La Xunta celebra'l so venticinco aniversariu

La Xunta pola Defensa de la Llingua Asturiana tien organizao, pal próximu sábadu 31 de xineru a les 18:00 hores, un actu conmemorativu que quier recordar los venticinco años que cumple la organización.
 
El Salón d'Actos del Muséu de Belles Artes d'Asturies ye'l llugar escoyíu pa celebrar l'actu, sorrayando la Xunta'l so calter simbólicu al ser el llugar qu'acoyera l'asamblea fundacional de la organización. Ye ésta la primer de les actividaes que van a desarrollase al rodiu d'un acontecimientu históricu qu'entamaba tal día como güei d'hai venticinco años.
 
Dende la Xunta pola Defensa de la Llingua Asturiana inviten a toles persones enfotaes na defensa de la llingua asturiana a participar nesti actu, que siguirá con un pinchéu na Casa Posafuelles, al que tán convidaos tolos asistentes.
 
La Xunta ye una organización de referencia dientro del ámbitu de la vindicación llingüística en toles sos estayes, actuando d'interlocutor colos axentes sociales, organizando campañes y conciertos, convocando manifestaciones y en definitiva, visibilizando'l conflictu llingüísticu que se vive n'Asturies.