El PP diz que namás el Comité Electoral va decidir les candidatures

El PP estatal alvirtió que ye'l Comité Electoral el que tien que decidir sobre les candidatures y refugó que-yos perxudique'l debate nel PP asturianu sobre Álvarez-Cascos.

El pasáu miércoles los responsables de les Xuntes Llocales del PP d'Uviéu, Xixón, Avilés y Mieres, acordies cola direición n'Asturies y de Nueves Xeneraciones, emitieron un comunicáu refugando una hipotética candidatura de Cascos a la Presidencia del Principáu. Esa posible candidatura, alegaben, "ta valiendo puramente pa intentar estremar al PP d'Asturies, otra vez con riesgu de rotura interna".  

Nuna rueda prensa na sede nacional, el vicesecretariu de Comunicación del PP, Esteban González Pons esplicó que nun trataron esti tema na xunta del comité de dirección, del que se van ocupar los órganos del partíu "cuando llegue'l momentu".
  
"Los órganos que tienen que decidir quién son los candidatos y escoyelos, tovía nun falaron. El restu d'órganos puen dar les opiniones qu'estimen oportunes pero'l que tien que falar sobre candidatures nin siquier se reunió", apuntó.

A preguntes por si les continues declaraciones sobre la posible candidatura de Cascos puen perxudicar al partíu y si nun sería conveniente que designaren yá al so candidatu, el responsable de Comunicación del PP esplicó que van nomar a les cabeces de llista tanto n'Asturies como nes demás comunidaes cuando consideren que más-yos convién electoralmente, como dixo na última Xunta Directiva Nacional Mariano Rajoy.
  
Nesti sen, recordó que'l partíu tovía nun nomó candidatos en nenguna comunidá nun siendo a Luisa Fernanda Rudi n'Aragón-- y añadió que los proclamarán "si too sal como ta previsto, xuntos y al empar".
  
"Poro, nun creemos que nenguna situación que ta produciéndose mos perxudique, yá que tamos actuando en función de los intereses electorales del PP, qu'aspiramos a que seyan los intereses electorales de los asturianos y tamién los del restu d'españoles".
  
Tamién se-y entrugó si 'Génova' tenía constancia de la denuncia de Benjamín Vilaboa, ún de los integrantes del Comité Electoral del PP d'Asturies, qu'acusó al partíu de suplantar la so firma nel escritu ellaboráu pol Comité Electoral del PP pa refugar la hipotética candidatura de Cascos. González Pons nun se pronunció alegando que les temes disciplinaries correspuenden al Comité de Derechos y Garantíes del partíu.