Álvarez diz que'l PSOE "antepón les necesidaes d'Asturies"

La presidenta del Parllamentu, María Jesús Álvarez, aseguró que'l PSOE "antepón les necesidaes d'Asturies sobre les partidaries" cola candidatura de Javier Fernández.

Álvarez faló de la candidatura socialista esti llunes, minutos antes d'impartir la conferencia inaugural del cursu de La Granda 'Depués de Lisboa: la Xunión Europea en tiempos difíciles'.

Nun quiso entrar a valorar los últimos acontecimientos relacionaos cola posible candidatura de Francisco Álvarez Cascos como cabeza llista del PP n'Asturies. "Nel PSOE siempre respetemos los procesos internos de toles formaciones polítiques pa escoyer a los sos candidatos y ellaborar les sos llistes. Creo que ye sano y sensato siguir faciéndolo", dixo.
  
Na so opinión, al presentar a Fernández nel día d'ayeri, "el PSOE volvió dar pruebes de cohesión interna, de rigor y de responsabilidá". Amás, tuvo palabres d'allabancia pal presidente saliente, Vicente Álvarez Areces, al que calificó como "un gran presidente". Destacó que tien "una forma bien especial de facer política, con gran implicación personal y pasión". Por ello, dixo, que "el papel políticu del presidente algamó niveles bien altos, difíciles de llograr".
  
"L'Asturies que l'añu que vien, cuando se produzan elecciones, vamos poder analizar, nun tien nada que ver cola de 1999. Nin por cohesión interna, nin por cohesión institucional nin por meyores en tolos ámbitos, nin pol puxu del nuesu propiu sector productivu", dixo, resaltando que "en too ello tuvieron un papel mui importante los trés gobiernos que presidió Areces".