El PP afirma que Blanco nun tien compromisos con Asturies

Ovidio Sánchez afirmó que la visita realizada por José Blanco foi "bien bona" porque dexa claro que'l Gobiernu d'España "nun tien nin un compromisu con Asturies".

En rueda de prensa, Sánchez resaltó esti xueves que la presencia del ministru na comunidá foi una amuesa de "sinceridá" qu'evidencia que'l presidente, José Luis Rodríguez Zapatero, "nun tuvo'l más mínimu compromisu con esta rexón".

Asina, llamentó que'l ministru señalara que "hai actuaciones que pueden retrasase ente unu y cuatro año y l'Autovía del Cantábricu va retrasase'l menor tiempu posible". Al respective, Sánchez resaltó que si yá hubo retrasos cuando nun s'anunciaben, y pasóse'l fin de les obres de 2009 a 2011, lo dicho pol ministru pue suponer que les obres "nun finen en cuatro o cinco año".
  
Amás, criticó la falta de credibilidá" del delegáu del Gobiernu n'Asturies, Antonio Trevín, qu'anunció en 2005 que'l tramu Unquera-Llanes acabaríase en 2009. Igualmente, reprochó'l tonu llastimeru" del presidente del Principáu, Vicente Álvarez Areces, pidiendo que se respeten los plazos AVE y finar les autovíes. "Tendría De ser contundente", encamentó.
  
Por ello, pal presidente del PP asturianu la visita de Blanco confirmó que'l Gobiernu d'España "nun va facer namás por Asturies nesta llexislatura", daqué que considera un fracasu" pa la obra pública, un ámbitu qu'entiende "fundamental" pa la economía asturiana.
  
Xuntu colos retrasos l'Autovía del Cantábricu, Ovidio Sánchez, fixo referencia a l'AVE con Madrid. Considera que dende l'Executivu central faise un trabayu "de distracción" y víase convencíu de que pal Gobiernu "nun va haber AVE hasta Uviéu y Xixón".
  
El presidente del PP d'Asturies criticó, tamién, que José Blanco nun se refiriera a otres obres importantes" pal Principáu y que fueron "compromisos" de Zapatero, como La Espina-Ponferrada, el túnel del Fito, l'enllaz ente l'Autovía Minera y l'Autovía del Cantábricu, el tercer carril  l'autopista 'Y', o'l peaxe del Güerna, ente otres.
  
"Foi una visita esclariante", machacó Ovidio Sánchez, el qu'afitó que ye evidente que "nun va haber AVE a Uviéu y Xixón, van paralizase les obres que nun tean al 80% d'execución, y les demás van tener retrasos d'ente unu y cuatro año". "Foi una bien bona visita porque dexa claro qu'esti Gobiernu nun va faer más n'Asturies. Yá da por terminaes les obres hasta 2012", sorrayó.