UNA opónse a l'aplicación de les midíes d'axuste n'Asturies.

El voceru d’UNA, Faustino Zapico, amosó la oposición de la so formación a les midíes de recorte de gastu, “son la cobertoría perfeuta p'anubrir la pésima xestión del Executivu PSOE-IX”.

Zapico señaló qu'a naide se-y puede escapar que “plantegar unes midíes p'aforrar menos de lo que suponen los sobrecostos d'El Muselón o l’HUCA, ye un meru insultu a los ciudadanos”.

Amás, afirmó que la crisis viéno-y como “aniellu al deu” al Principáu pa xustificar unos recortes que tendría que facer sí o sí, “hai que recodar les crítiques del Tribunal de Cuentes estatal y la Sindicatura de Cuentes pola nefasta xestión de los fondos públicos y a la contratación a deu”.

Dende UNA recuerden que’l Conseyeru de Sanidá plantegó depués de zarrar el financiamientu autonómicu, la futura quiebra del sistema de servicios públicos n'Asturies, “ensin qu'esistiera nengún plan dende'l Gobiernu central pa recortar gastos sinón de tolo contrario, d'incentivación del gastu públicu, que dexa bien a les clares que los problemes financieros d'Asturies son muncho anteriores a les midíes d'axuste brutales impuestes dende Madrid y Bruxeles”.

Faustino Zapico denunció que “n' Asturies, onde tán pendientes d'execución proyeutos de los fondos mineros o onde les empreses lleven subvenciones millonaries y depués piesllen ensin más como Venturo XXI, nun ye asumible plantegar esta mena d'axustes que sedríen perfectamente evitables con una xestión responsable y non colos chiringos d’anguaño”.

Pal cabu Faustino Zapico, dixo que’l discutiniu ente PSOE ya IX sobre a qué trechu aplicar la xuba del IRPF, val pa nun entrar nel problema de fondu que “nun ye qu'un trabayador gane más o menos, evidentemente calteniendo la progresividá nos tributos a les rentes del trabayu, sinón que los que provocaron la crisis siguen ensin ver les sos rentes ensin la menor progresividá nin xuba tributaria, y el Gobiernu asturianu sigue mirando haza otru llau y aplicando midíes de dereches” concluyó.