La tresferencia de Picos d'Europa va entrar en vixencia'l 1 de xineru

El presidente del Patronatu de Picos d'Europa y conseyeru de Biodiversidá cántabru, Jesús Oria, aseguró que nun va haber problema pa que la tresferencia entre en vixencia'l 1 de xineru.

Oria señaló que tres seis años de discutiniu, les tres autonomíes implicaes llevaron "mui bien" el procesu, dao que se punxeron d'acuerdu pa treslladar al Gobiernu central una propuesta qu'aceptó'l Secretariu d'Estáu Mediu Rural y Agua, Josep Puxeu y la ministra de Mediu Ambiente y Mediu Rural y Marín, Elena Espinosa.

Sicasí, esplicó que los directores xenerales de les trés comunidaes autónomes van afondar nel apartáu de personal y la distribución de les places, anque aseguró que les partes implicaes tamién tán d'acuerdu na so "redistribución".
  
D'esta manera, prevése que toles cuestiones a tratar tean ultimaes depués del branu pa convocar la comisión mista de tresferencies col fin de materializar el trespasu del Parque Nacional a últimos del próximu mes d'ochobre.
  
Jesús Oria realizó estes declaraciones en Lleón, mientres la vixésima xunta d'esti organismu, a la que posiblemente va siguir otru alcuentru antes del 2011, que va tener llugar en Cantabria.
  
El presidente del Patronatu recordó que cuando'l Tribunal Constitucional sentenció que los Parques teníen que pasar a manes de les comunidaes autónomes, fízose cola idea de caltener la unión nos espacios naturales, algo no que, garantizó, trabayen Asturies, Cantabria y Castiella y Lleón.
  
Por estos motivos, les partes implicaes trabayen coles mires de caltener Picos d'Europa "tal como taba" y, si ye posible, ameyorar les sos condiciones.