XEGA premia col 'Triángulu Rosa' al Comité d'Empresa de 'Idees en Metal'

XEGA falló güei'l premiu añal 'Triángulu Rosa', que recayó nel Comité d'Empresa de 'Idees en Metal', pol so sofitu a una trabayadora mientres el so procesu de reasignación sexual.

Según esplicó'l coordinador de XEGA, Mané Fernández Noriega, esti galardón reconoz l'actitú favorable haza lesbianes, gais, transexuales y bisexuales. Amás, la organización premió a Emma Blanco nel concursu de cartelos que convoquen cada añu.

Coles mesmes, la organización otorgó'l Lladriyu Rosa', que critica les actitúes homófobes, al pub uvieín 'Filar', pola so actitú ante l'agresión d'una pareya homosexual nel so local.

Per otra parte, XEGA tamién presentó güei les actividaes programaes con motivu del 28 de xunu, 'Día Internacional de lesbianes, gais, transexuales y bisexuales' (Día del Arguyu LGTB) n'Asturies. Asina, Fernández Noriega recordó que yá se tán desenvolviendo distintes actividaes dende'l pasáu día 12, que van siguir col cinefórum 'Plegaries pa Bobby', nel que se va proyeutar el llargumetraxe 'Prayers for Bobby' (VOSE) dirixida por Russell Mulcahy en 2009. Nel posterior alderique va intervenir como invitáu JM Ruiz Marcos. Va Ser el sábadu 19 de xunu, a les 19.30 hores nel Conceyu Abiertu.

El vienres día 25, a les 19.30 hores, va tener llugar la presentación del llibru 'Deseyo y resistencia'. La so autora, Gracia Trujillo, va presentar la so postrera obra 'Deséu y resistencia. 30 años de movimientu lésbicu nel Estáu español'. Va Acoyer la presentación, el Salón d'actos del Conseyu de la Mocedá de Xixón.

El programa va siguir el llunes 28 de xunu, a les 19.30 hores, col actu políticu- institucional 'Día del Arguyu LGTB 2010'. Tres la intervención de les distintes personalidaes polítiques, sindicales y sociales d'Asturies, va dar en la entrega de los Premios Lladriyu Rosa, Triángulu Rosa y del XIII Concursu de Cartelos de XEGA. Va Ser nel Salón d'actos del Centru de Cultura Antiguu Institutu de Xixón.

El llunes 28 de xunu, a les 21.00 hores, Xixón va acoyer la manifestación 'Arguyu LGTB 2010'. La marcha va salir de la cai Xovellanos hasta la Plaza Mayor. Al rematar la manifestación, va lleese'l Manifiestu del Arguyu 2010: 'Pola igualdá trans'.

La programación cerrará'l sábadu 3 de xunetu, cola participación na manifestación estatal, que va tener llugar en Madrid a les 18.00 hores.