Iglesias anuncia que pretenden facer una Izquierda Unida más abierta

El coordinador d'IU y parllamentariu, Jesús Iglesias, anunció güei la intención de la so coalición de facese "más plural, más abierta, con más elementos y persones".

Amás, consideró que la convocatoria d'una güelga xeneral pal próximu 29 de setiembre por los sindicatos "va contribuyir a que la mayoría social balte la reforma llaboral" del gobiernu estatal, ante la que mostró la so oposición. A la entrada de la 'Asamblea de Refundación y pola Salida de la Crisis', el máximu mandatariu de la coalición n'Asturies atendió a los medios de comunicación.
  
Preguntáu por una posible "refundación de la ESquierda", Iglesias mostróse francu: "la esquierda va ser más fuerte si d'esta crisis salse dende la esquierda, con polítiques d'esquierda y con perspectives d'izquierda". Sicasí, anunció que pretenden "facer esfuerzos pa facer una Izquierda Unida más abierta, más plural con más elementos y más persones", pero recordó que si nun se sal de la crisis pela esquierda "en concencia nun vamos poder dicir que'l nuesu proyectu trunfó anque algamare un meyor resultáu electoral".
  
Al marxe d'esti tema, mostró'l so apoyu a la convocatoria de fuelga xeneral pa "valtar la reforma llaboral", que trai "namás el despidu más baratu". "La CEOE critica estéticamente, pa nun favorecer la respuesta ante esi decretu, y pa torgar que la oposición de la mayoría de los ciudadanos lu valte. Tamos convencíos de que ye posible baltar el decretu, y que la convocatoria d'una fuelga xeneral va contribuyir a ello", señaló.
  
Asina, asitió l'actu de güei na intención de "poner en común sensibilidaes d'esquierda y la necesidá de nun rindise ante les esixencies del Bancu Mundial o del FMI, o los que vienen a pol estáu del bienestar, y a destruyir lo poco qu'hai de bienestar".
  
Mostróse favorable a "dar una respuesta dende lo político, pero tamién dende lo social". "La necesidá d'establecer complicidaes dende la sociedá", pues hai "que dici-yos a estos poderes indeterminaos que nun tamos dispuestos a que lo que se llogró tres décades de lluches de trabayadores, desapaeza agora de sutrucu".