PSOE ya IU balten una comisión d'investigación sobre Venturo XXI

PSOE y IU-BA-Verdes refugaron nel Plenu de la Xunta Xeneral el pidimientu del PP de crear una comisión d'investigación sobre la situación a la que llegó la empresa Venturo XXI.

La empresa cartográfica Venturo XXI ta en concursu d'acreedores y plantega un espediente d'estinción de contratos. Los trabayadores permanecen zarraos nel Conceyu de Samartín del Rei Aurelio en señal de protesta.

El diputáu del PP, Joaquín Aréstegui, calcó na necesidá d'investigar esti asuntu, puesto que casi la metá del so capital ta aportáu por sociedaes públiques. Tamién se refirió a les ayudes públiques que recibió la compañía. "Namás conociendo lo que pasó vamos poder evitar situaciones asemeyaes nel futuru", dixo.
  
Fixo un llamáu a PSOE y a IU-BA-Verdes, recordando qu'ellos tamién taríen presentes nesa comisión d'investigación. "Ye lo menos que podemos facer polos 73 trabayadores, que son víctimes d'esta posible estafa", nuna compañía na que calcó nel papel destacáu del director del Institutu de Desarrollu Económicu del Principáu d'Asturies (Idepa), Víctor González Marroquín.
  
Pero'l diputáu del PSOE, Luis Ángel Colunga, tachó d'artificial la pretensión del PP d'una comisión d'investigación, porque'l PP yá tien tolos datos. "A ustedes nun-yos importen los trabayadores", calcó, sorrayando que lo que-y asocede a la oposición ye que tán "presionaos" pol Conceyu d'Uviéu, y el so alcalde Gabino de Lorenzo, porque la esposa del director xeneral del Idepa ye la vocera socialista municipal, Paloma Sainz.
  
Colunga esplicó que'l PP yá tien accesu a les actes de los Conseyos d'Alministración de la compañía. "Nun tien sen una investigación pa qu'ustedes conozan lo que yá saben", afirmó, señalando que'l PP busca dar osíxenu a los problemes del Conceyu d'Uviéu, como'l pagu de Villa Madalena.
  
El voceru d'IU-BA-Verdes, Jesús Iglesias, acusó al PP de "devaluar" la figura de la comisión d'investigación. "Yo prefiero siguir pidiendo una solución pa los trabayadores", apuntó, recordando que la Xunta yá aprobó una resolución pa la continuidá de la compañía. Asina, esplicó qu'una comisión d'investigación nun va garantizar la continuidá de los puestos de trabayu, teniendo en cuenta amás que se tán buscando inversores.
  
Iglesias considera que la máxima responsabilidá de la situación de Venturo XXI ta na parte privada de la mesma, y non na pública. Recordó amás que la dirección local d'IU de SMRA va acudir a la Fiscalía por esti asuntu. Pero'l so refugu a la Comisión d'Investigación, esplicó, básase en que nun se cree qu'esista un interés real pol asuntu y que lo que busca ye utilizar a los trabayadores como "rehenes" del Conceyu d'Uviéu.
 
Salariu social

D'otru llau, la sesión plenaria de la Xunta Xeneral del Principáu d'Asturies valió pa que la Cámara aprobare por unanimidá ún de los puntos recoyíos nuna moción del PP que pide acutar les midíes en materia de personal y medios técnicos que seyan necesarios pa resolver l'atascu existente nel xornal social básicu. Son 600 los espedientes que s'atopen "trancaos".
  
La moción del PP constaba d'otros trés puntos, que fueron refugaos pol PSOE y IU-BA-Verdes, qu'acusaron a la oposición d'utilizar esti asuntu de forma oportunista.
  
Nel orde del día tamién constaba una proposición non de llei del PP que pidía la inmediata realmisión del ex director del Muséu Etnográficu de Grandas de Salime, José Naveiras Escanlar. Pero la iniciativa retiróse y nun se debatió güei.