La metá de los procesos por violencia de xéneru archívense antes de xuiciu

Un 54,3 por cientu de los procedimientos penales entamaos n'Asturies nel 2009 por supuestos casos de violencia contra la muyer archiváronse antes de l'abertura de xuiciu oral.

"Una cifra preocupante" que mide la complexidá del fenómenu de la violencia contra la muyer y que pon de manifiestu la "poca eficacia" que tien, n'ocasiones, el recursu a la vía penal. Asina lo indicó  en rueda de prensa'l fiscal delegáu de Violencia Doméstica y de Xéneru d'Asturies, Gabriel Bernal, qu'apuntó que, d'otra manera, un 84,7 por cientu de les causes xulgaes na comunidá acabó con sentencia condenatoria, superando "con diferencia" la cifra nacional del 76,6 por cientu. "Ye meyor un sobreseimientu provisional qu'una sentencia absolutoriu", precisó.
  
Bernal valoró amás "l'estancamientu" nel númberu de procesos penales entmaaos l'añu pasáu, que superaron namás en dos los entamaos nel 2008. En concreto, nel 2009 los 19 xulgaos d'instrucción qu'asumen n'esclusiva esti tipu de procesos nel Principáu -ún por partíu xudicial- tramitaron 3.115 asuntos penales y 330 civiles, de los qu'un 81 por cientu incoáronse gracies a la denuncia de la mesma víctima, y namás nún 0,3 por cientu a propuesta de les families.
  
Pa Bernal del Castillo, les cifres ponen de manifiestu que "les campañes de los poderes públicos pa incentivar les denuncies de les víctimes calaron nes muyeres". Llamentó, sicasí, que les denuncies presentaes se retiraren nun 14,8 por cientu de los casos, lo que supón que "casi 15 de cada cien muyeres denunciantes retratáronse" y negáronse a emprestar declaración, enzancando'l esclaramientu de los delitos.
    
Amás, de les 833 solicitúes d'ordes de protección, un 49 por cientu refugáronse por motivos xurisdiccionales y un 51 por cientu concediéronse. Una cifra que'l fiscal consideró mui baxa, y que ye "bastante inferior" al 70 por cientu de la media estatal.
 
Menores de 30 años y estranxeros
  
Per otra parte, Bernal destacó'l porcentaxe relevante y creciente que representen les víctimes y los agresores menores de 30 años, y calcó sobre la necesidá d'actuar na prevención n'ámbitos como'l de la publicidá, onde se sigue 'cosificando' a la muyer, ye dicir, tratándola como un oxetu. N'esti sen comentó qu'un 39 por cientu de les víctimes de violencia son muyeres estranxeres y un 29 por cientu de les agresiones coméntenles inmigrantes que "importen patrones enraigonaos" nos sos países d'orixe.
  
El voceru de la Fiscalía valoró "bien positivamente" que nel añu 2009 nun se rexistrare nenguna muerte asociada a violencia contra la muyer n'Asturies, anque llamentó que no que va del 2010 el númberu de víctimes "rompió la llinia d'años precedentes" y sume en "una cierta perplexidá a tolos operadores xurídicos y espertos na materia". "Ye llamentable qu'a estes altures del añu llevemos el porcentaxe que llevamos", alertó.
  
N'otru orde de coses, anunció que'l Ministeriu Públicu trabaya nel fenómenu "preocupante" de la violencia doméstica porque "nun toles perspectives son positives" y apuntó que cada vez "son menos los fechos nos que son autores persones d'avanzada edá y cada vez ye mayor el porcentaxe d'agresores menores o mozos que realicen actos violentos sobre los sos padres o güelos".
  
A lo último, Bernal del Castillo criticó l'interés sobre'l númberu de denuncies falses, al considerar que supón "cuestionar" la normativa y remitióse a un estudiu del CXPX nel que s'examinaron más de 500 asuntos sospechosos de falsedá, y entendióse que "namás una podía selo".
  
Nel capítulu de recursos colos que cuenta l'organismu, reprochó'l "llendáu" númberu de médicos forenses y psicólogos que trabayen na Unidá Forense de Valoración Integral y la saturación de los puntos d'alcuentru porque "torguen la eficaz respuesta de l'Alministración de Xusticia".