El xuez aprecia nicios de delitu nos socialistes imputaos polos minipisos

El xulgáu emitió un autu nel que diz qu'aprecia nicios de delitu societariu y falsificación de documentos mercantiles na axudicación de les obres de los minipisos de la Llaboral.

Ente los sos reponsables señala al anterior director xeneral de Vivienda y actual director de la Zalia, Enrique Álvarez, al director xeneral d'Ordenación del Territoriu y Urbanismu, Guillermo Morales, el que fuere director de Patrimoniu, Elías José Uría de la Fonte y la que fuera xerente de l'axudicadora Vipasa, María José Hevia.
 
El xuez del xulgáu númberu dos d'instrucción d'Uviéu, apunta que "procede siguir los trámites qu'establez la llei pal procedimientu abreviáu, preparación del xuiciu oral, puesto que de lo actuao apaecen nicios más que bastantes de la realidá de los fechos y de la participación nellos".
  
L'autu, al que tuvo accesu Europa Press, vien motiváu pola denuncia que presentó'l diputáu del PP na Xunta Xeneral del Principáu d'Asturies, José Agustín Cuervas-Mons, contra los responsables de l'axudicación por falsificación de documentos mercantiles y delitu societario.
  
El xulgáu señala que nel espediente pa la execución de 102 viviendes y trasteros en réxime d'arriendu na Llaboral "se falsificaron" determinaos documentos roblaos por Enrique Álvarez, Y.D.M. y R.R.S., faciendo constar como fecha'l 26 d'avientu del 2007 "cuando en realidá ellaboráronse y firmáronse en fecha sin concretar sobre payares del 2008".
  
Amás d'eso, l'autu da por comprobáu que nel espediente apaez que nel acta de la xunta del conseyu de fecha 21 d'avientu del 2007 figura un acuerdu pol que s'axudica'l proyectu de viviendes na Llaboral al estudiu del Arquitecto Díaz Rojo por 320.000 euros y el contratu firmóse supuestamente'l 26 d'avientu del 2007 por 381.654 euros más IVA, "lo que supón un importante aumentu del importe sin xustificación alguna aparentemente en namás cinco díes".
  
Asina considera que la documentación "falsificada ellaboróla" la qu'entós yera xerente de Vipasa, María José Hevia, y "roblóla" Enrique Álvarez González, Y.D.A., R.R.S., Elías José Uría de la Fuente y Guillermo Morales, que "conocíen los fechos y consintiéronlos".
  
D'ende que'l xuez entienda que los fechos denunciaos "pudieren ser polo menos de primeres constitutivos de delitu imputáu a María José Hevia González, Enrique Álvarez, Guillermo Morales, Elías José Uría, Y.D.A, y R.R.S".
  
Nos fundamentos xurídicos l'autu afonda na naturaleza de la supuesta falsificación y diz que de na investigación realizada apréciase "la inesistencia d'espediente real" pa la contratación de los arquitectos pal trabayu, y la simulación "a posteriori" d'un "espediente ficticiu" cuando "por razón d'un cambiu políticu diben cambiar los responsables de la empresa". El xuez revela qu'ún de los nicios ye que nos contratos supuestamente roblaos nel 2007 apaez el logotipu que Vipasa nun empezare a usar hasta l'añu 2008.
  
En poniendo de relieve otra serie de nicios contrastaos nes actuaciones realizaes, el xuez señala qu'hubo una "contratación discrecional" de los arquitectos pal proyectu "como si mos alcontráremos ante una empresa privada, sin sometelo a concurrencia real alguna, en fecha sin determinar de mediaos a últimos del 2008 y la simulación d'un espediente como supuestamente efectuáu l'añu anterior" porque la llei torgaba "dafechu" que nel añu 2008 se ficieren esi tipu de contrataciones. Tamién se refier a les "versiones contradictories" de los imputaos.
  
"Ensin llugar a duda tou l'espediente ellaboróse a posteriori, nel momentu que, tres les eleiciones, cambió la dirección de Vipasa, y había qu'aparentar que les coses se ficieren polo menos indiscutiblemente bien, y non como'l qu'alministra un negociu priváu", sigue l'autu.
  
El xulgáu dio treslláu al Ministeriu Fiscal y a les acusaciones particulares pa que, nel plazu de diez díes, formulen escritu d'acusación solicitando l'abertura de xuiciu oral o'l sobreseimientu de la causa. Tamién puen solicitar escepcionalmente la práctica de más dilixencies. L'autu puede recurrise nel plazu de cinco díes.
  
El diputáu del PP, Agustín Cuervas-Mons, autor de la denuncia, va ofrecer güei una rueda prensa sobre esti asuntu na Xunta Xeneral del Principáu.