Los sindicatos esperen que la movilización tenga continuidá

Miles de persones percorrieron güei martes les principales cais d'Uviéu na movilización convocada polos sindicatos como fin de la xornada de fuelga de los emplegaos públicos.

El secretariu de la Federación de Servicios a la ciudadanía de CCOO, Jesús González, afirmó que la so organización espera qu’esta movilización tenga continuidá nel tiempu ante los nuevos ataques del gobiernu de Zapatero", en referencia a un posible decretu sobre la reforma llaboral que traería  una fuelga xeneral.
 
El secretariu xeneral de la Federación de Servicios d'UXT, Alberto del Valle, manifestaba en declaraciones a los medios que "el Gobiernu tuvo falsiando los datos del siguimientu de la fuelga" que les organizaciones sindicales cifraron nel 81% frente al 11% del que fala'l Gobiernu.
 
Los sindicatos indicaron que los retayos "afecten a tolos ciudadanos" y consideraron qu'el de la movilización tien de ser el camín a siguir frente a midíes qu'afrellen los derechos de el trabayadores.
 
La movilización tuvo encabezada polos secretarios de CCOO, UXT, CSIF, SUP, CEP, UFP, Suatea, Sipla y Anpe que portaben una pancarta na que podía lleese "En defensa de los servicios públicos, les pensiones y l'emplegu. Non a los retayos salarial y social". La marcha partió de la estación de Renfe a los siete de la tarde y concluyó na plaza d'España.
 
Participación del 81% n'Asturies
 
Los sindicatos afinquen que la fuelga del sector públicu tuvo un siguimientu del 81%, seis puntos perriba de la media nel Estáu. Mientres, el Principáu diz que ye secundada pol 9,2%.
 
El porcentaxe qu'ufren los sindicatos, calculóse descontando los servicios mínimos, que los sindicatos volvieron calificar de "abusivos dafechu". En tou casu, González mostróse satisfechu pol grau de siguimientu per parte de los emplegaos públicos yá dende primer hora de la mañana, nuna xornada na que nun se rexistraron incidentes d'importancia y que trescurrió con tranquilidá, según los sindicatos.
 
Por ámbitos, el siguimientu de la güelga foi del 78% n'educación,  mientres que'l porcentaxe más altu rexistróse na alministración llocal, del 94 por cientu. Nesti puntu, Jesús González resaltó l'altu grau de siguimientu en tolos conceyos, cola esceición d'Uviéu y Siero.
 
Na Alministración autonómica'l porcentaxe asítiase nel 84%, mientres que na estatal nel 72%. A lo último, Salú rexistra un 76% y Correos un 78%, según los datos de los sindicatos. La fuelga de güei nel sector públicu ta convocada por CC.OO, UXT, CSIF, Suatea, ANPE, UFP, SUP, CEP, Sipla, UGC y l'Asociación de Familiares y Simpatizantes pola Dignidá de los Guardies Civiles.

9,2% según el Principáu
 
La xornada de paru na función pública ye secundada pol 9,20 por cientu de el trabayadores según el Gobiern d’Asturies. Según afirmen, los datos recoyíos al 90 por cientu de recuentu de los centros de trabayu hasta les 13.30 hores indiquen un siguimientu del 14,2 por cientu ente los trabayadores de l'Alministración Xeneral y Organismos. Nel ámbitu de la Xusticia, el paru ta siendo secundáu pol 17,51 por cientu, mientres que nel sector educativu la incidencia ye del 10 y del 3,3 por cientu en Sanidá.

Educación asitia nun 5% el siguimientu
 
El conseyeru d'Educación y Ciencia, José Luis Iglesias Riopedre, dixo que la fuelga de los servicios públicos convocada güei tien un siguimientu d'un 5% aproximadamente nel ámbitu educativu asturianu.
 
"Nos centros docentes y na Conseyería nun había xente que faltaba al trabayu polo que vi", señaló. Los servicios mínimos na educación asturiana yeren aproxiadamente'l 20 por cientu del personal. "La fuelga ye un fracasu claru y rotundu", afirmó.
  
Riopedre fixo estes manifestaciones a los periodistes n'asistiendo al actu de la firma del conveniu específicu de collaboración ente l'Alministración del Principáu d'Asturies y l'Universidá d'Uviéu, polo que se fixen compromisos aplicables a la concesión de sovenciones directes pal desarrollu del Plan Estratéxicu de Viabilidá y Conversión a Campus d'Escelencia Internacional.
  
Preguntáu sobre la repercusión de la güelga na Universidá d'Uviéu, el rector, Vicente Gotor, dixo que tovía nun tenía datos y qu'esistíen servicios mínimos pa los exames, recordando que nun hai clases. "Hasta agora nun lo noté, nel Rectoráu taba tol mundu trabayando", comentó.
  
A pocos metros d'onde Riopedre y Gotor facíen estes declaraciones una trentena de sindicalistes de CC.OO manifestábense frente a les puertes de la Xunta Xeneral del Principáu d'Asturies, glayando "Nin un pasu atrás: contra'l decretazu, güelga xeneral".