Uviéu va acoyer el 'II Alcuentru de Pueblos Indíxenes'

El direutor de l'Axencia Asturiana de Cooperación presentó'l programa del 'II Alcuentru de Pueblos Indíxenes: Cosmovisión y Resistencia' que se va desarrollar n'Uviéu'l 10 y 11 de xunu. 

Acompañáu de dellos miembros de la Comisión Asturiana de Pueblos Indíxenes,  Rafael Palacios recordó que los pueblos y naciones indíxenes representen, nel mundu actual, casi 500 millones de persones en más de 70 Estaos distintos, "estimándose qu'hai sobre 5.000 pueblos y naciones diferenciables, caúna cola so propia identidá, cultura y forma d'organización social".
  
El direutor de l'Axencia Asturiana ha destacar que "ye de vital importancia arriquecer o, polo menos, caltener la diversidá cultural como Patrimoniu de la Humanidá, a lo que namás ye posible contribuyir apoyando'l caltenimientu y el fortalecimientu de la cultura y l'identidá indíxenes".
  
Según Palacios, los pueblos y naciones indíxenes sufren la esclusión política, económica, social y cultural, reflexu d'una esclusión histórica con base nel colonialismu y la esplotación tanto de les sos xentes como de los sos territorios. Sufren en mayor midida emprobecimientu y la violación de los sos derechos.