Más de 16.500 firmes contra la Llei Antitabacu

El Club de Fumadores pola Tolerancia recoyó n'Asturies 14.696 firmes contra la Llei Antitabacu, lo qu'asitia al país na cuarta posición, referentes a los apoyos contra la prohibición total.

Según informó'l Club de Fumadores pola Tolerancia en declaraciones a Europa Press, yá se punxo en marcha una plataforma n'Internet, www.prohibidoprohibir.org, col oxetivu d'axuntar a tolos fumadores mayores d'edá qu'anden pela rede pa recoyer firmes en contra del endurecimientu de la llei anunciáu pola ministra de Sanidá, Trinidad Jiménez. Ún de los principales oxetivos de la plataforma ye demostrar el descontentu xeneralizáu qu'hai, sobremanera nel sector de la hostelería, pol anunciu de la prohibición total. Nesti momentu, yá se recoyeron les 320.000 firmes en trés meses, y esperen superar les 500.000.

L'asociación ta desarrollando bona parte de la so actividá pa frenar l'endurecimientu de la Llei n'Internet. Asina, el Club de Fumadores pola Tolerancia tien hai tiempu la so páxina en Facebook, en Twitter y dispón d'una canal en YouTube, cola qu'informa a diariu de les novedaes que surden sobre l'amenaza de prohibir dafechu'l consumu de tabacu en tolos llugares públicos zarraos.
  
Acordies cola encuesta 'Tolerancia y Cortesía', ellaborada por Clau Consultors pal Club de Fumadores pola Tolerancia, el 86,5 por cientu de los ciudadanos d'Asturies ta d'acordies con que los fumadores tengan un espaciu onde poder fumar. Según indicaron, estes cifres contradícense colo que se ta diciendo dende'l Ministeriu de Sanidá y Protección Social. Asina, aseguren que los asturianos tán en contra d'una prohibición total de fumar n'hostelería: el 54,1 por cientu de la población dexaría la llei como ta o hasta eliminaríala.
  
La convivencia ente fumadores y non fumadores n'Asturies ríxese por pautes de "respetu y tolerancia": el 79,7 por cientu de los non fumadores asturianos asegura nun sentise nada o poco molestos si se fuma na so presencia, mientres que namás el 13,2 por cientu de los fumadores sintióse refugáu n'algunes o en munches ocasiones. Namás un 27,6 por cientu de los non fumadores asturianos nun va nunca a zona de fumador cuando llega a un restorán acompañáu de fumadores y namás un 39,7 por cientu de los fumadores asturianos escueye siempre zona de fumadores cuando van acompañaos de non fumadores.
  
Según l'asociación, la encuesta permite sacar la conclusión de que la prohibición, d'entrar en vixencia, ta lloñe de ser una solución incide nuna nueva problemática derivada del consumu de tabacu: 'el cigarrón'. Asina'l 77,6 por cientu de los fumadores asturianos afirma que, en casu de prohibición, van salir a la cai a fumar, col consiguiente problema de desordes públicos y molesties a los vecinos.