'Churruca' garantiza la Conferencia contra la ocupación d'Iraq

Jesús Montes Estrada garantizó que siguen alantre colos actos que pretenden xuntar en Xixón al conxuntu de la resistencia iraquina, contra l'actual gobiernu y la ocupación estranxera.

El conceyal de Cooperación y tercer teniente d'alcaldede Xixón Montes Estrada garantizó qu'estos actos van celebrase a partir del 17 de Xunu, si los conferenciantes y demás participantes algamen los visaos pa poder entrar n'España.
  
En rueda prensa, el conceyal de Cooperación aseguró qu'esiste un programa y una previsión dende hai meses y esclaró que nun se fizo nada na clandestinidá. Como exemplu, indicó que l'ex secretariu de Xusticia d'Estaos Xuníos, Ramsey Clark, que va participar nestos actos, visitó Xixón per últimu vez el pasáu 27 de Marzu.
  
Montes Estrada mostró unos documentos nos que la Conferencia Internacional contra la Ocupación Iraquina (Ceosi), organizadora de los actos, aceptó retardar les feches de la Conferencia, de Marzu a Xunu, a pidimientu del Ministeriu español d'Asuntos Esteriores.
  
El conceyal xixonés aseguró desconocer el cambiu d'opinión esperimentáu pola Alministración Central nesti sen y afirmó que, una vez más, la política esterior española vuelve tar subordinada a "los intereses norteamericanos, a los mercaos y a un gobiernu corruptu", el del actual presidente iraquín, Yalal Talabani.
  
La Conferencia Internacional de la Resistencia Política Iaquí ta previsto que se celebre a partir del próximu vienres 18 de Xunu en Xixón, anque los sos participantes empezaríen a llegar a la ciudá'l xueves 17. Ta organizada pola Ceosi y cuenta cola collaboración del Conceyu de Xixón y el Gobiernu del Principáu d'Asturies.