El 69% d'asturianos ta a favor de prohibir el tabacu nos chigres

El 69 por cientu de los asturianos consideren positiva la prohibición del tabacu en llocales d'ociu zarraos, lo que supón un incrementu del cinco por cientu sobre l'añu pasáu.

Ente los partidarios de la prohibición total, atópense'l 82 por cientu de los non fumadores, y el 47 por cientu de fumadores. Amás, sólo la metá d'estos últimos opónense a modificar la llei del tabacu.
  
Asina lo demuestra un estudiu realizáu pola Sociedá Asturiana de Medicina Familiar y Comunitaria (Samfyc), publicáu güei coincidiendo cola XI Selmana sin Fumu que va tener llugar ente los díes 24 y 31 de mayu baxo'l lema 'Pon-y fecha. ¡Xuntos podemos!'.
  
Nesti contestu, presentó güei la directora xeneral de Salú Pública y participación, Amelia González, los actos entamaos con motivu del Día Mundial sin Tabacu que se celebra'l día 31 de mayu. Acompañáronla na presentación el xefe de la Unidá de Coordinación del plan sobre Drogues, José Ramón Hevia; el presidente del Colexu Oficial de Farmacéuticos d'Asturies, José Villazón, y el médicu de la Sociedá Asturiana de Medicina de Familia y Comunitaria (Samfyc), José Manuel Iglesias.
  
La encuesta, realizada a 613 persones qu'acudieron al so centru de salú n'Asturies mientres el mes d'abril, revela amás que'l 26,1 por cientu de los asturianos afirma qu'acudiría más a los llocales d'ociu si'l tabacu tuviera prohibíu dafechu. D'otra manera, el 15,7 por cientu, reduciría les sos visites. Pela so parte, José Manuel Iglesias, contó que lo determinante p'aplicar la llei antitabacu tien de ser la salú, y non los intereses económicos.
  
Tamién en relación al impactu de la llei na hostelería, un 72 por cientu de non fumadores asegura tener problemes p'atopar llocales llibres de fumu, frente a un 56 por cientu de fumadores. Ambos grupos coinciden en que los espacios con prohibición de fumar, van ayudar a reducir el consumu de tabacu, o al abandonu. Nesti sen, un 85 por cientu cree que la prohibición meyoraría la salú de los asturianos.
  
No referente a fumadores pasivos, l'estudiu cifra en 150 les muertes añales rellacionaes col fechu de tar espuestos al fumu de los demás. Ello ye que según la Organización Mundial de la Salú (OMS), ún de cada ocho muertos por tabacu son fumadores pasivos. Sicasí, tovía'l 13 por cientu de los asturianos creen qu'alendar fumu nun ye perxudicial.