Asturies dobló en marzu del 2010 el númberu d'esportaciones

Asturies dobló nel mes de marzu del 2010 les esportaciones, sobre'l mesmu mes del 2009. Asina algamó en mazu d'esti añu'l nivel más eleváu dende ochobre del 2007.

El nuesu país asítiase asina como la comunidá autónoma con mayor crecimientu tanto al respeuto de marzu del 2009, como en tases interañales. Asina lo apunta un informe qu'analiza la evolución del comerciu esterior d'Asturies mientres esi mes, asina como a lo llargo del primer trimestre del 2010, a partir de la información suministrada pola Base de Datos 'Comex', de la Secretaría d'Estáu de Comerciu, que recueye los datos provisionales facilitaos pol Departamentu d'Aduanes y Impuestos Especiales de l'Axencia Estatal d'Alministración Tributaria.
  
Según informó al traviés d'un comunicáu de prensa la Dirección Territorial de Comerciu y Delegación del Icex n'Asturies, les esportaciones en marzu los 317.207 miles d'euros, l'importe más eleváu dende ochobre del 2007, lo que supón un 98,26 por cientu más que'l mesmu mes del 2009.
  
Sicasí, puesto que los precios de les esportaciones midíos nos sos valores unitarios, baxaron un 1,9 por cientu, l'aumentu real de les esportaciones foi del 102,10 por cientu. Tolos sectores esperimentaron aumentos, menos los alimentos, que presenten una lixera reducción del 2,3 por cientu, y les manufactures de consumu, con un descensu más acusáu por cuenta de la cayida de les ventes de les fibres y texíos textiles. Les mayores subíes produxéronse nos sectores de materies primes, semimanufactures (sobremanera cinc) y bienes de consumu duraderu.
  
Pela so parte les importaciones crecieron, tamién sobre'l mesmu mes del 2009, un 15,84 por cientu, llegando hasta los 302.105 miles d'euros; nesti casu, al baxar los precios de les importaciones un 1,2 por cientu, l'aumentu real foi del 17,25 por cientu.
  
De resultes, y como segundu mes siguíu, la balanza comercial del mes de marzu presenta nel país un superávit de 15.102 miles d'euros, con una tasa de cobertoria del 105 por cientu.
  
Nel primer trimestre del añu, les esportaciones asitiáronse en 764.998 miles d'euros, lo que supón un aumentu del 55,90 por cientu respectu al primer trimestre del 2009 y asitien tamién a Asturies como la comunidá autónoma con mayor subida interañal.
  
Sicasí, puesto que los precios de les esportaciones baxaron un 2,2 por cientu, el crecimientu real foi del 59,40 por cientu. Les importaciones rexistraron una subida del 12,49 por cientu interañal, hasta quedar en 773.705 miles d'euros. Nesti casu, los precios de les importaciones baxaron un 1,2 por cientu nos trés primeros meses del añu, polo que l'aumentu real de les importaciones foi del 13,85 por cientu. El déficit comercial a final del trimestre asitióse en malapenes 8.707 miles d'euros, un 95,58 por cientu menor que nos primeros trés meses del 2009, asitiando la tasa de cobertoria nel 98,87 por cientu.
  
La meyora de les esportaciones tamién se reflexó nel númberu d'empreses esportadores, puesto que fueron 508 les empreses que vendieron al esterior nos dos primeros meses del añu (últimos datos conocíos), lo que supón una subida del 1,6 por cientu sobre'l mesmu periodu del 2009.
  
Por sectores, el meyor comportamientu de les esportaciones tuviéronlu les materies primes, tanto carbón como derivaos del petroleu, y les semimanufactures, especialmente les de metales non ferrosos (que crecieron un 326 por cientu), anque tamién aumentaron les ventes de fierro y aceru y los productos químicos.
  
De la mesma manera meyoraron les ventes los productos enerxéticos y los bienes de consumu duraderu. Pel contario, tantu les esportaciones de manufactures de consumu (pol descensu de les ventes de texíos y fibres textiles), como de los Bienes d'Equipu (fundamentalmente pola cayida de les ventes de buques y equipos d'oficina y telecomunicaciones) baxaron.
  
Tamién baxaron les ventes d'alimentos y automoción. No referente a les importaciones, tolos sectores esperimentaron aumentos, nun siendo los alimentos y los productos enerxéticos. Les mayores subíes produxéronse nes compres de materies primes, tanto de pasta de madera como de minerales.
  
Por árees xeográfiques, meyoraron les ventes a tolos continentes, nun siendo Oceanía, destacando especialmente los aumentos de les esportaciones a América del Norte (fundamentalmente cinc a Estaos Xuníos), Europa, con crecimientos xeneralizaos ente tolos países, y Asia (gracies principalmente a les ventes de barcos de pesca con destín a Indonesia).