Ovidio Sánchez propón a Rajoy que Cascos seya'l candidatu del PP

El presidente del PP d'Asturies pidió-y a Mariano Rajoy qu'Álvarez-Cascos seya'l próximu candidatu popular. Sicasí, Cospedal afirmó desconocer tal pidimientu.

Ovidio Sánchez, treslladó a la dirección estatal que l'ex vicepresidente del Gobiernu y ex ministru de Fomentu, seya'l candidatu de los populares asturianos a la Presidencia del Principáu, según una información publicada güei pol diariu La Nueva España, confirmada por fontes del PP asturianu a Europa Press.
  
Sánchez realizó distintes declaraciones nos últimos meses nes qu'emponderó la figura de Cascos y señaló que l'ex ministru provoca "entusiasmu" na xente del partíu.
  
En tou casu, el presidente de los populares vino calcando en qu'una posible candidatura del ex ministru depende del propiu Cascos y que son los estatutos del partíu los que marquen los trámites a siguir pa la elección del cabezaleru de llista.
 
Cospedal desconoz el pidimientu
 
La secretaria xeneral del Partíu Popular, María Dolores de Cospedal, aseguró güei desconocer si'l PP asturianu propunxo a Mariano Rajoy que Francisco Álvarez-Cascos seya'l candidatu a la presidencia del Principáu.
  
"Nun tengo constancia de que fuera asina. D'hipótesis nun pue falase porque esti asuntu ye bien seriu, puesto que ye'l presidente del PP n'Asturies y tien que decidilo'l PP d'Asturies, y va comentase a nivel nacional, pero ye una responsabilidá del PP d'Asturies y a ellos correspuénde-yos; nun tengo que facer nengún xuiciu previu", apuntó Cospedal en Guadalaxara. Añadió que ta convencida de que'l PP d'Asturies va proponer "al que va ser el meyor candidatu p'Asturies, d'eso nun me cabe la menor dulda".
  
Sicasí, el secretariu xeneral del PP d'Asturies, Fernando Goñi, dixo güei que la propuesta, per parte del presidente del PP d'Asturies, Ovidio Sánchez, a Mariano Rajoy, pa que el ex ministru de Fomentu, Francisco Álvarez-Cascos, seya'l candidatu del PP n'Asturies a la presidencia del Principáu constitúi "un primer pasu" pa que'l partíu gane les elecciones n'Asturies.
  
Goñi, a entrugues de los periodistes nos pasiellos de la Xunta Xeneral del Principáu, esplicó que Sánchez treslladó la propuesta a Rajoy nuna conversación que tuvo llugar hai díes, nuna xunta cola dirección estatal del PP. L'oxetivu, según Goñi, ye que'l PP d'Asturies acuda a les elecciones "col meyor candidatu".
  
D'esta manera, y al treslladar la propuesta a Rajoy, Goñi señala que se recoyó un pidimientu "de toos", al considerar que Cascos sería un "gran candidatu" pal Principáu d'Asturies. "Dixímoslo yá dende hai meses", apuntó. Esplicó que, d'equí p'arriba, van dase "nuevos pasos" que van zarrar a lo último l'oxetivu: "ganar les elecciones col meyor candidatu y col meyor partíu". Goñi nun esclaró si'l mesmu Cascos tuvo al corriente de la propuesta.
  
El secretariu xeneral del PP d'Asturies calcó en que la elección del candidatu n'Asturies va realizase acordies con la normativa interna del partíu y col apoyu de los órganos del partíu, tanto d'Asturies como de Madrid. "Los candidatos a les comunidaes autónomes y a les capitales de provincia desígnalos el Comité Electoral Nacional, pero siempre se fai acordies coles direcciones rexonales del partíu", indicó Goñi.