PP de Lleón critica'l doble llinguaxe del PSOE sobre Sama-Velilla

El PP de Lleón criticó'l "doble llinguaxe" utilizáu polos representantes del PSOE a Sama-Velilla y solicitó a Rodríguez Zapatero, qu'esprese con valentía la so postura al respeuto.

El PP pronuncióse d'esta manera tres les manifestaciones realizaes polos socialistes d'Asturies nes qu'aseguraron que Zapatero va velar pa que se execute'l proyeutu, que promueve Rede Eléctrica Española (REE).

De la mesma, esixó que "d'una vez por toes" l'Executivu central concrete si se va realizar o non la infraestructura. "El nuesu monte precisa una respuesta clara y contundente del Gobiernu. Zapatero sabe perfectamente que ye incompatible la Sama-Velilla col respetu al paisaxe y al mediu ambiente", añadió'l PP nuna nota recoyida por Europa Press.
  
Amás, recordó les declaraciones realizaes mientres el periodu electoral por integrantes socialistes nes qu'espresaron el so refugu a la execución de la llinia d'alta tensión. Nesti contestu, preguntóse si Rodríguez Zapatero apoya a los socialistes lleoneses o a los asturianos.
  
El PP de Lleón consideró que "yá nun se pue esperar más", polo que requirió a l'Alministración central que "dexe clara" la so postura sobre la Sama-Velilla porque los cargos del Gobiernu "dicen una cosa" n'Asturies mientres el PSOE de Lleón "diz otra" y Zapatero "nun esclara" lo que va facer el Gobiernu. "Mentanto, el monte sigue esperando noticies", acabó.