La Xunta refuga pidir al Gobiernu un informe sobre la Campa Torres

La Xunta Xeneral refugó col votu en contra del PSOE y l'astención del PP, pidir al Gobiernu qu'envíe a la Cámara un completu informe sobre les pieces de la Campa Torres.

Asina se recoyía na moción presentada pol PP motivada pola preocupación énte'l "aparente espoliu producíu" y dempués de que "la conseyera de Cultura nun diere nenguna esplicación al respeuto na pasada interpelación".
  
El diputáu del PP, Alfonso Román López, foi l'encargáu de defender la moción, qu'indicó que tien por oxetu esclarar tolo asocedío cola apaición "d'un 'zulu'" nel que s'atopaben numberoses pieces arqueolóxiques. El popular acusó a la conseyera de Cultura y Turismu, Mercedes Álvarez, de "mentir y nun esplicar lo asocedío" na anterior interpelación.
  
"Cómo pue usté venir a la Xunta y dicir qu'esi 'zulu' ye un almacén museísticu y que les pieces tán catalogaes y inventariaes. Nun pue tener tanta desfachatez", dixo'l diputáu del PP a la conseyera mostrándo-y fotografíes de les pieces. "Usté sabe como yo que nun esiste inventariu", dixo.
  
El diputáu indicó que na Cámara naide tien cuenta de cargar contra'l que foi director de les escavaciones de la Campa Torres, Francisco Cuesta, que nesti momentu ocupa'l cargu de director del Muséu de Grandas de Salime, anque indicó que la conseyera "paez la mecenes del señor Cuesta".
  
Román López afirmó que tamién ye necesario que'l Gobiernu esclare tolo relacionao cola Escuela Taller Noega. Según el parllamentariu, los alumnos del centru desarrollaron la escavación ensin tar capacitaos pa ellos.
  
El PSOE refugó la moción y consideró que la defensa de la mesma torna nuna nueva interpelación a la conseyera . "Ustedes vienen equí a disparar con ametralladora a toes manes", dixo'l diputáu socialista Alfonso Rei, qu'aseguró que tanto'l Conceyu de Xixón como la Conseyería ta dispuesta a poner tola información de la Fiscalía y de quien faiga falta.
  
El grupu parllamentariu d'IU-BA-Verdes, Roberto Colunga, xustificó l'astención del so grupu porque indicó que consideren que lo más apropiao ye que la investigación abierta por Fiscalía siga'l so cursu sin intromisiones. "Pensamos que lo que pretende'l PP nun ye esclarar lo que pasó coles pieces sinón que lo que quieren ye dase autobombu, por eso nós vamos astenemos", dixo Colunga.

Felgueroso diz que la denuncia  nun significa nada

L'alcaldesa de Xixón restó importancia a l'almisión a trámite pela Fiscalía de la denuncia presentada pol PP sobre'l supuestu abandonu de restos arqueolóxicos na Campa Torres.
 
"Nun significa nada", dixo, antes d'añadir que se fai pa poder pidir información a los posibles implicaos y ver si hai delitu. Felgueroso, en respuesta a los periodistes depués de la inauguración de la iniciativa 'Gijón, de cócteles' nun hotel de la ciudá, destacó que la villa punxo de manifiestu toos estos años "non solo la protección del patrimoniu arqueolóxicu sinón especialmente la voluntá de caltenimientu y inversión, que probablemente ye de les más altes".
  
Coles mesmes, indicó que nun tenía noticia de que dende Fiscalía se tuviere pidío al Conceyu "absolutamente nada", de cara al esclaramientu de la denuncia presentada pol PP, na qu'esti partíu señaló que los fechos podríen ser constitutivos d'ún o más delitos contra'l Patrimoniu Históricu Español, tipificados nos artículos 323 y 324 del Códigu Penal.