La UE abrió procedimientu d'infracción por El Vascu

La Comisión Europea decidió abrir procedimientu d'infracción a España pol alcuerdu ente la Conseyería d'Economía y Jovellanos XXI pa la construcción del Palaciu de Xusticia.

L'acuerdu denunciáronlu ante la Comisión Europea'l 27 de xunetu del 2009 les organizaciones d'IU y Verdes d'Uviéu por vulneración de la Directiva que regula los contratos del sector públicu, al entender que realmente constituyía un contratu d'obres tapáu, axudicáu sin concurrencia pública.
  
Na contestación a la denuncia, a la que tuvo accesu Europa Press, la Comisión Europea comunica que decidió, conforme a lo establecío nel artículu 258 del Tratáu sobre'l Funcionamientu de la Unión Europea (TFUE), enviar una carta d'emplazamientu a les autoridaes españoles "por presunta infracción de la normativa comunitaria de contratación pública na axudicación directa pol Principáu d'Asturies a la empresa Xovellanos XXI d'un contratu d'obres par la construcción d'un Palaciu de Xusticia n'Uviéu".
  
La carta d'emplazamientu ye'l primer pasu d'un procedimientu d'infracción al que les autoridaes españoles tienen dos meses pa contestar.
  
Según señaló'l voceru d'IU d'Uviéu, Alejandro Suárez, el Gobiernu del Principáu d'Asturies yá conocía con antelación l'abertura d'esti procedimientu "tal como correspuende a la cortesía ente alministraciones públiques".
  
Y esa circunstancia y non otra foi, según IU, lo que motivó la reciente resolución del alcuerdu ente Principáu y Jovellanos XXI, "que se vistió como renuncia de la empresa". A xuiciu d'Alejandro Suárez, la Unión Europea actuó en defensa de los intereses de los ciudadanos, evitando un desfase de 100 millones d'euros de sobrecostu nuna axudicación tapada d'un total de 190 millones.
  
Mientres, el voceru de los Verdes d'Uviéu, Javier Lozano alvirtió que van actuar igual que n'otru tipu d'asuntos semeyantes. "Tenemos que facer que lo público tea bien alministrao y nun se faigan favores col dineru de toos", dixo.