Entama'l trámite del estudiu d'impactu ambiental de l'AVE

José María Pérez anunció que'l Ministeriu de Mediu Ambiente entamó'l trámite del estudiu d'impactu ambiental de l'AVE L.lena-Xixón con una consulta medioambiental.

Asina, el conceyal de Promoción Económica y Innovación del Conceyu de Xixón anunció que'l Ministeriu unvió una consulta previa al entamu del estudiu d'impactu ambiental del proyeutu de la llinia d'Alta Velocidá Madrid-Asturies, nel so tramu La Pola Ḷḷena-Xixón. En rueda prensa nel Conceyu, destacó qu'esto muestra'l compromisu del Gobiernu anunciáu recientemente pol ministru de Fomentu, José Blanco, y l'entamu del proyeutu.
 
Pérez indicó que nel documentu recibíu nun se define l'itinerariu, sinón qu'ha analizase les condicionantes de cualquier posibilidá de trazáu, anque sí que se señala'l mapa del ámbitu d'actuación, que parte del enllaz de la Variante de Payares col nuevu túnel y abarca tou esi valle, per Morcín y Riosa pa entrar n'Uviéu "de manera distinta a l'habitual", pa depués llegar a Xixón.
 
En total, taríen afeutaos los conceyos de Ḷḷena, Riosa, La Ribera, Siero, Morcín, Uviéu, Xixón, Mieres, Llanera y Corvera. El Ministeriu unvió la mesma consulta a toos estos conceyos, asina como a delles conseyeríes del Principáu, a la Delegación del Gobiernu y a distintos colectivos como Agües de Cuenca del Norte o asociaciones ecoloxistes. Toos ellos van tener un plazu de 30 díes hábiles pa poder enviar les sos alegaciones, si lo creen oportunu.
 
Nesti sen, Pérez, adelantó que'l documentu comentóse güei na Xunta de Gobiernu Local y añadió que yá s'unvió a los servicios municipales por que s'analice, valore y faigan propuestes pa unvialu al Ministeriu. El conceyal apuntó qu'anque pue opinase de too, lo lóxico ye opinar de la zona propia, nesti casu, del conceyu de Xixón. Nel documentu que s'ellabore van facese los diagnósticos ambientales oportunos o va dase la meyora de midíes protectores correctores de carácter ambiental.
 
El conceyal calcó en que, anque nun se fala d'un itinerariu marcáu, señálase espresamente que'l trazáu tien de llegar al centru de les ciudaes y aprovechar la centralidad d'éstes, amás de que fai referencia a operaciones ferroviaries como'l plan de soterramientu de les víes en Xixón. Coles mesmes, calcó en que con esti pasu previu entámense tolos informes y procedimientos alministrativos necesarios pa la posterior contratación del proyectu de construcción.