David Artime vuelve ganar el Premiu Arbidel de cuentos eróticos

El candasín David Artime volvió ganar por segundu añu siguíu'l concursu 'Arbidel' de relatos eróticos en llingua asturiana, que convoca'l Conceyu de Ribesella, col cuentu 'El problema vascu'.

El relatu ganador ye una narración erótico-humorística que trata, dende un puntu de vista satíricu, el vieyu tópicu de les dificultaes p'algamar caltener relaciones sexuales en determinaos ambientes del País Vascu, reflexáu nun conocíu cantar del grupu Lehendakaris Muertos, tituláu de la mesma manera que'l cuentu d'Artime. L'áccesit foi pa 'La Expedición', del dramaturgu y novelista Dolfu Camilo.

El Xuráu tomó güei la decisión, tres reunise en Ribesella. Taba formáu por Nieves Otero Paraja, especialista n'asturianu pola Universidá d'Uviéu y profesora d'asturianu, Roberto Glez-Quevedo González, secretariu de l'Academia de la Llingua asturiana y Xandru Martino Ruz, especialista n'asturianu pola Universidá d'Uviéu, y faciendo de secretariu con voz, pero sin votu, Juan González Martino, conceyal de cultura del Conceyu de Ribesella.
  
El premiu pal ganador son 1.200 euros y pal áccesit 500, amás de los diplomes acreditativos. La entrega premios tendrá llugar el próximu miércoles, a les 19.00 hores na Casa la Cultura de Ribesella, nel marcu de la Selmana de les Lletres qu'esti Conceyu celebra de forma paralela a la del Principáu.