Darréu celebra'l 1 de mayu en Llangréu contra la represión

Darréu va celebrar el 1 de mayu en Llangréu con una marcha y una espicha cola que quieren denunciar la “llacediosa situación d’Asturies”, la represión y el capitalismu.

Baxo’l llema ‘La crisis social que la pague’l capital’, dende  Darréu quieren convidar a tola sociedá llangreana y asturiana a amestase a la convocatoria xunitaria que proponen. “Nesti 1 de mayu queremos denunciar la llaceriosa situación que tamos sufriendo n’Asturies. Vamos camín de los 90.000 paraos y l’añu pasáu hubo más de 16.000 accidentes llaborales  nel país”, afirmen.

Tamién indiquen qu’un 14% de la población asturiana vive baxo lumbral de la probitú, y que cada mes delles empreses salten a l’actualidá cola anuncia de despidos masivos y pieslles de les mesmes, “los ERE y el terrorismu patronal golpeen cada vegada más fuerte”.

“El camín pa espertar la concenxa coleutiva ye bien cenciellu: l’activismu y la xunidá popular. Esi ye’l camín qu’atalantamos correchu dende la nuesa organizacin, poro, vamos manifestanos esti próximu 1 de mayu en Llangréu en defensa de los porgeyos de les clases populares”, indiquen dende Darréu.

La organización señala qu’ente les torgues qu’atopen nel día a día ta la represión; “N’Asturies por tola esquierda revolucionaria ye conocida la persecución poltica y el trabayu de la Brigada d’Información, manexada pol señor Antonio Trevín”.

Falen, amás, de represión nos conceyos. “D’actualidá ta agora’l casu de la represión que tamos viviendo en Llangréu, onde delles organizaciones presentes nel conceyu sufrieron multes de miles y miles deuros y amenaces por parte del rexime”, asina señalen que decidieron axuntase esti 1 de mayu en Llangréu en defensa de los derechos del Pueblu Trabayador Asturianu, “pol socialismu y contra la represión”.

La convocatoria entama a les 17:00 hores na Casa Conceyu de Llangréu, en  Sama, onde van facer una concentración denunciando la “situación llaceriosa  d’Asturies” y contra’l capitalismu. A les 17:30 hores anuncien una marcha combativa contra la represión nel Conceyu y en sofitu de la clase trabayadora y los derechos coleutivos d’esta. A les 20:00 hores van entamar una espicha con precios populares y conciertu de grupos mozos.