El Bloque llamenta'l "ridículu y la comedia" cola capitalidá cultural

El Bloque llamenta’l “ridículo y la comedia” que tán faciendo’l PSOE y el PP na candidatura a capitalidá cultural europea. Mientres qu'Hevia amosó'l so sofitu a Uviéu 2016.

“La cosa yá empezó mal de parte la Conseyería de Cultura que foi incapaz de consensuar una candidatura en condiciones implicando a tolos sectores de la sociedá asturiana, el casu más claru ye que la Universidá d’Uvieú apoyó a una candidatura andaluza en cuenta facelo cola asturiana”, indiquen dende la formación nacionalista.

Pal Bloque, la desllealtá mayor bien “otra vez más” del alcalde d’Uviéu Gabino de Lorenzo, “que nun-y importa dexar, otra vez más n’evidencia, al grupu de trabayu col conceyal de Cultura Arias-Cachero a la cabeza y desmarcase de la candidatura unitaria por intereses partidistes y personales volviendo a demostrar que lo que menos-y importa ye la ciudá d’Uviéu”.

Pa la formación, "lo más esperpéntico y digno de Valle-Inclán vien cuando al salvador de la derecha asturiana, anque la metá del so partíu nun lu quiera ver cerca, el señor Álvarez Cascos, se-y descubre qu’apoyó a la ciudá de Santander pa que fuera la sede de la capital cultural europea pal añu 2016. ¿Hai dalguién que piense qu’esti señor pueda ser candidatu pa gobernar Asturies?", entrúguense.

Con estos antecedentes, la fomación diz que "por desgracia", alo únicu que pue aspirar una candidatura asturiana ye a ser capital provinciana con minúscula y ensin cultura. "Sinón nun nos explicamos el tratu que se-y da a la cultura na capital asturiana, como ta pasando con Santa María del Naranco, La Foncalada o los proyeutos d’acabar con la ilesia de Santuyano", afirmen.
 
El Bloque diz que tovía sigue esperando’l tratu dignu que prometió’l conceyal de cultura pa la llingua asturiana, que nun tien la toponimia aprobada, la presencia del idioma asturianu ye nula, "y nin siquiera ye a abrir una oficina de normalización llingüística como la que tienen dalgunos de los conceyos más pequeños y con menos población del nuestru país".

"Por desgracia paeznos imposible qu’Uviéu puea ser sede d’esti eventu internacional, anque tovía tamos a tiempu y ofrecémonos desinteresadamente a trabayar en condiciones pol bien d’Asturies y de la so capital, Uviéu", señalen pa finar.
 
El gaiteru y académicu d'honor José Ángel Hevia tresmitió al Conceyu d'Uviéu'l so apoyu a la candidatura de la ciudá. Asina, afirmó que sería un importante añu pa Uviéu y pa toa Asturies. "Vamos disfrutar y vamos facer disfrutar a Europa coles nueses meyores aportaciones culturales", señaló.
  
Hevia, natural de Villaviciosa, espresó na carta d'adhesión el so deséu de tar n'Uviéu "nel momentu que s'anuncie la so Capitalidá Europea de la Cultura 2016". "Soi un Mateín que quedó nesta ciudá, y toi convencíu de que voi compartir con tolos uvieínos y tolos asturianos la fiesta que vamos tener esi día y que va ser l'anunciu d'un mui importante añu pa la nuesa ciudá y pa toa Asturies, nel que vamos disfrutar y vamos facer disfrutar a Europa coles nueses meyores aportaciones culturales".
 
Hevia apoya la candidatura 
 
Hevia súmase na llista d'adhesiones a la candidatura uvieína a les yá espresaes pol campeón de Fórmula 1 Fernando Alonso, los tamién deportistes Javi Villa, David Villa o Juan Mata, asociaciones, colexos profesionales, centros docentes, conceyos y centros asturianos de distintos países.

Amás, l'Asociación de Peñes Azules del Real Oviedo (APARO) dirixió una carta al alcalde, Gabino de Lorenzo, espresando'l so apoyu a la candidatura. El colectivu, que preside Hugo López, considera que la capital del Principáu ye "la candidata ideal" a Capital Europea de la Cultura 2016.
  
Les Peñes Azules van incorporar d'equí p'arriba el logotipu de la candidatura en tolos autobuses que s'utilicen pa los viaxes de la promoción. Tamién anunciaron que van asitiar pancartes alusives a esta iniciativa en tolos campos de fútbol que visiten y espresen al Conceyu la so disposición "pa realizar cualquier actividá na que se considere oportuna nuesa presencia".