El PP compara los proyeutos d'El Musel col 'petromochu'

Alejandra Cuétara dixo que'Areces tien de dar esplicaciones del "fracasu" de los proyeutos enerxéticos d'El Musel, tal que fixo Juan Luis Rodríguez Vigil sobre "el petromochu".

Nuna rueda de prensa ufiertada n'Uviéu, la diputada del PP comparaba asina la situación de los proyeutos d'El Musel colo asocedío en 1993 n'Asturies, depués del anunciu d'un proyeutu industrial millonariu a cargu supuestamente d'un bancu saudí. Descubrióse que yera un montaxe, y Juan Luis Rodríguez Vigil dimitió.
 
Cuétara dixo que tolos compromisos realizaos por Areces de tornar al Puertu d'El Musel nel 'polu enerxéticu' del norte d'España tornaron en "fumo" cola desapaición de los proyectos que pretendíen instalase nél.
 

Dixo que les inversiones en plantes de biodiésel nun se van llevar a cabu y que'l ciclu combináu tamién. Ello ye que comentó que la planificación enerxética d'Areces ye "desastrosa", puesto que depués  d'anunciar qu'Asturies se tornaría nun "güertu enerxéticu" con numberosos ciclos combinaos, demostróse a día de güei que l'escesu de capacidá instalada n'España de xeneración eléctrica basada nel gas y la puxanza de les renovables suupón que los ciclos combinaos namás s'utilicen al 20%, "lo qu'elimina d'un refundiu la construcción de nueves plantes n'Asturies".
  
Cuenta añadió qu'hasta la planta regasificadora proyeutada pa El Musel cuerre'l riesgu de tornar en dalgo "invidable", teniendo en cuenta que coles dos plantes que yá s'atopen en funcionamientu en Galicia y País Vascu el mercáu yá ta satisfechu.
  
Al Musel namás-y queda la regasificadora, tabla quemando a la que s'agarra'l Gobiernu", comentó Cuétara, que tuvo acompañada pol so compañeru na XXPA Ramón García Cañal. Recordaron que'l mesmu Areces añadió los tráficos qu'orixinaríen esa planta a la capacidá del puertu pa desarrollar los creitos colos que se va pagar l'escesu de coste qu'acumula la obra d'ampliación d'El Musel. "Pero si nun hai ciclos combinaos, l'actividá de la regasificadora va reducise y si nun hai actividá ye difícil pensar que los tráficos vayan producise", afirmó.
 
Pero amás el Grupu Parllamentariu Popular tien previsto pidir esplicaciones al Gobiernu sobre otros "fracasos" en materia d'Industria. Asina, Cuétara señaló que la producción industrial baxó  un 7,5 por cientu respecto al mesmu periodu del 2009 y que'l Principáu acumula 20 meses de cayida.
  
Acusó a Areces de realizar un discursu descomanadamente optimista va un añu por dicir qu'Asturies taba meyor preparada pa la crisis y dixo que'l númberu de paraos pasó de 63.614, a últimos del 2008, hasta los 83.606 a 31 de marzu d'esti añu.
  
Los 'populares' tamién criticaron que l'Institutu de Desarrollu Económicu del Principáu d'Asturies (Idepa) nun promovió nin una acción nueva contra la crisis, que les esportaciones asturianes cayeron un 20,38% nel 2009 y que dellos polígonos industriales nin siquier empezaron a executase tres diez años.