Obama y l'aventura espacial

Ernesto Avelino Suárez's picture
AdxuntuTamañu
Image icon 305804main_200901200001HQ_full.jpg1.05 MB
Taxonomy upgrade extras: 

Chismes y bilordios percuerren la Nasa. Entrugues ensin rempuesta amurnien el Ames Research y naide sabe bien, acullá de les conxetures, qué maquetes van entrar nos túneles de vientu de Langley o qué aleaciones van prensase en Huntsville, Alabama. En Pasadena descansen les cadarmes de los nuevos robots, a mediu acabar, naguando polos sos vuelos interplanetarios, coles pegatines del Jet Propulsion acabante poner. De Dryden a Houston, de White Sands a Cabu Kennedy el ser o'l nun ser d'una axencia qu'oliva polos mandaos de la nueva alministración debátese con intensidá entre unes y otres opciones, les más de mal auguriu. ¿Y quién ye Obama pal espaciu? ¿ Un Kennedy visionariu o un Nixon estrafalariu, capaz de dar anuncia de la fin del programa Apollo, en directo, delantre de tol mundu, en comunicación cola cápsula del XVII, que volvía d'aquel viaxe máxicu al valle de Taurus Litthrow, noqueando con aquelles pallabres de rendición a los mismísmos Eugene Cernan y Harrison Smith? Proyectos suspendios o sondes espaciales d'apavoriantes vuelos, naves tripulaes, base llunar, exploración humana de marte. El cosmos como fonte de recursos o como infinitu territoriu pa la guerra.

El mandatu presidencial, pa lo más de la ciudadanía, tien qu'encarar, de mano, l'estáu de les instituciones financieres, la salú de la economía, el paru, la política exterior, la seguranza social, la asistencia médica y el mediu ambiente.

¿Ú encaxa l'espaciu en tou esto? Pa responder tenemos qu'estremar tolo que tien que ver col espaciu nes sos aplicaciones y falar, entós,  d'esploración robótica y humana, observación terrestre, vuelos tripulaos a órbita baxa y programes de seguranza nacional.
 
Nos cuarteles xenerales de la Nasa hai munchu suspense por saber si los fondos van dar pa llevar alantre'l programa d'exploración de la Lluna y Marte nos plazos previstos. El presidente electu nun tien porqué cumplir el programa "Vision of Space" de Bush, nun ta obligáu nin siquiera a mirar pa él.

De fechu, lo que paez ye que les actividaes humanes basaes en viaxes a la Lluna y a Marte van tener que retrasase dellos años. Esti retrasu pue dar en que se pospongan los dos llanzadores Ares, la cápsula Orión, y el módulu llunar Altair, amás d'una estensión de les operaciones del Shuttle col procuru de mantener la estación internacional. Aunque habría que mencionar que los llanzadores comerciales, con vectores fechos por empreses privaes tán de verdá mui cerca. Robláronse va tres selmanes  dellos contratos importantes. Son los programes qu'aína van  dir saliendo nes portaes de la prensa, y que facilitarán muncho les coses: SpaceX y Orbital. Con eses naves en funcionamientu el Shuttle podría retirase nel plazu previstu, anque lo que nun se-yos arreglaría, de toes toes, ye facer misiones tripulaes. Col tresbordaor convertíu en pieza de muséu y hasta lla estrena de la apolínea cápsula Orión nun hai nada que rascar. Van pasar unos años ensin que los EEUU tengan ferri a les estrelles. Pa eso la solución namás pasa por siguir mercando sillones na incansable Soyuz. Una verdadera humillación nacional. A cambiu de volar nun páxaru como'l STS, tener que lo facer nuna pota express a la que-y lleven cambiando les gomes dende va 42 años.

Recortes nel programa Constellation igual puen eliminar presión sobre'l restu de proyectos y permitir que qu'otros programes civiles sigan alantre. Esto supondría continuar colos programes científicos de sondes espaciales interplanetaries y cola reorientación de los proyectos d'observación terrestre haza los problemes del mediu ambiente.
 
El tema de la seguranza nacional va ser otru cantar. La llamada war on terror nun tien pinta d'aparar. Igual que les dos guerres asiátiques. El ruxe-rux ye que los americanos ven cómo el so dominiu na carrera espacial ta siendo erosionáu sigún van desenrollándose les capacidaes de China, Europa, Rusia y India nesti campu. Por estes y otres razones casique se pue asegurar que los fondos empobinaos a programes específicos de defensa y intelixencia van enamplase col envís de restablecer la seguranza nacional.
 
Sicasí habrá un llamáu a qu'espoxigue la eficiencia esborriando duplicidaes y redundancies onde se puea. La conocida tayada con bisturí de la que-y falara Obama a McCain na pasada campaña y que ta acabante de incluyir nel discursu inaugural. L' área considerada pa encadarmalo ye la de la Missile Defense Agency (MDA). Paez haber un consensu curiosu en que un grau importante de duplicación podría ser elimináu meciendo a la MDA con otes organizaciones espaciales del estáu. Otres fusiones tán entamando a pensase col criteriu de mantener al máximu el nivel de seguranza coles mínimes perres posibles.
 
Lo predecible ye que la fueya de ruta d'Obama pal espaciu seya la de la continuación de los programes de seguranza a costa de quita-yos recursos a los programes civiles. El día 2 de febreru ye'l memorial de los astronautes cayíos na exploración del espaciu. Entrugues y rempuestes llistes pa despegar.

Comentarios

Harth Wllham falaba del espaciu como una parte d'un universu estáticu, funcional, ideal, y prestosu. Pel llau contrariu Werner Von Braum abarcaba l'espaciu, conocíu como estratosfera, como un nuevu campu batalla tecnolóxicu onde les V-2 seríen les walkilries d'un holocaustu wagnerianu. Yo decátome más pola deficinicón de Frederick Mactrope de tener al espaciu como un "omphalos" metafísicu, anque enxamás pro-haagelianu, nun se que vais dicirme tocante a ello pero bien que diba gustame saber de la vuestra opinión. Eso sí, voi oponeme con toles mios fuerces a los concpetos de Jenifferr Sckaltheenson que vía al espaciu como un llugar a saquear, baxo un prisma científicu, propagando la idea que un nuevu Atila blincaría de galaxia en galaxia hasta dominar tola Vía Láctea unviando colonos a Ganímedes, eso non lu veo bien, ¿Qué me decís vos?

Gabis

Contador Estadistiques