Espaciu y Tiempu de la Llingua Asturiana

Bilordios Filolóxicos, por Ramón d'Andrés

Les contracciones: esquema (19/05/03)

Artículu EL

PREPOSICIÓN + ARTÍCULU

Contracciones: a + el: al, de + el: del, pa + el: pal, so + el: sol, con + el: col, con + la: cola, con + lo: colo, con + los: colos, con + les: coles, en + el: nel, en + la: na, en + lo: no, en + los: nos, en + les: nes, per + el: pel, per + la: pela, per + lo: pelo, per + los: pelos, per + les: peles, por + el: pol, por + la: pola, por + lo: polo, por + los: polos, por + les: poles.

Nun formen contracción y escríbense xebrao: a la, a lo, a los, a les, de la, de lo, de los, de les, pa la, pa lo, pa los, pa les, so la, so lo, so los, so les.

Si l'artículu entama un topónimu nun se fai contracción: Van a El Pedroco, Van a L'Alloru, Vien d'El Mazucu, Vien de L'Eru, Tán pa El Puntal, Tán pa L'Infiestu, Vivíen so El Xerrón, Vivíen so L'Infanzón, Tamos con El Remediu, Tamos con L'Outeiru, Tamos con L'Agüeria, Tamos con Los Campones, Tamos con Les Arriondes, Paren n'El Quintanal, Paren en L'Uméu, Paren en L'Azorera, Paren en Los Xanos, Paren en Les Coes, Anden per El Llosón, Anden per L'Aguiyón, Anden per La Pola, Anden per Los Rozos, Anden per Les Cuestes, Trabayen por El Busllán, Trabayen por L'Enguilu, Trabayen por La Felguera, Trabayen por Los Eros, Trabayen por Les Felgueres.

Lo mesmo asocede colos títulos d'obres, nomes de locales, etc.: "A El viaxe diéron-y un premiu", "Los personaxes d'El cuartu negociu", "Afalagos pa El sentimientu d'un occidental", "Entretúvose con El trunfu prietu", "Lleílo n'El vientre del círculu", "Votaron por L'aire de les castañes". Entraron n'"El Paragües", Paren per "La Castañal", Antroxen con "Los Berrones".

"TOU" + ARTÍCULU

Contracciones: tou + el: tol, toa + la: tola, too + lo: tolo, toos + los: tolos, toes + les: toles.

Nun se fai contracción si l'indefiníu nun acompaña al artículu por tar en sintagmes diferentes: El coche estropiólu tou'l vecín, La casadiella comióla toa la muyer de Venancio, Les consumiciones pagáronles toes les que taben equí sentaes. Atención: Repartieron carambelos pa toos los neños 'los neños foron los autores del repartu', Repartieron carambelos pa tolos neños 'los neños foron l'oxetu del repartu'.

Si l'artículu forma parte d'un topónimu, títulu d'obra, etc., nun se fai contracción: Conoz tou El Mazucu, Inundóse tou L'Eru, Axuntóse toa La Pola.

"CADA" + "ÚN"

Contracciones: cada + ún: caún, cada + una: caúna, cada + uno: caúno, cada + unos: caúnos, cada+ unes: caúnes.

"EN" + DEMOSTRATIVU

Contracciones: en + esti, etc.: nesti, nesta, nesto, nestos, nestes; en + esi, etc.: nesi, nesa, neso, nesos, neses; en + aquel, etc.: naquel, naquelli, naquella, naquello, naquellos, naquelles.

Les formes acentuaes del demostrativu xeneren les contracciones nésti, nésta, nésos, néses, naquél, naquéllos, etc

"EN" + "UN"

Contracciones: en + un: nun, en + unu: nunu, en + ún: nún, en + una: nuna, en + uno: nuno, en + unos: nunos, en + unes: nunes.

"EN" + "ÉL"

Contracciones: en + él: nél, en + elli: nelli, en + ella: nella, en + ello: nello, en + ellos: nellos, en + elles: nelles.

PREPOSICIÓN + PREPOSICIÓN

Contracciones: per + ente: pente, pa + ante: pante, a + en: an.

Nun faen contracción: pa en, d'a, d'ente, d'en, etc

"PER" + ALVERBIU

Contracciones: per + equí: pequí; per + acá: pecá; per + acó: pecó; per + ehí: pehí, perhí; per + ende: pende; per + ellí: pellí; per + allá: pellá; per + alló: pelló; per + enriba: penriba; per + arriba: perriba; per + encima: pencima, percima; per + embaxo: pembaxo; per + abaxo: perbaxo.

Estes contracciones son optatives, de mou que tamién ye correcto escribir: per equí, per acá, per acó, per ehí, per ende, per ellí, per allá, per alló, per enriba, per arriba, per encima, per embaxo, per abaxo.

OBSERVACIONES FINALES

1. Si hai duda ente l'apóstrofu o la contracción, tien preferencia ésta.

2. Les contracciones nun s'apostrofen
Exemplos: cola amiga, del abogáu, pela arena, tol ensame, y non *con l'amiga, *col'amiga, *de l'abogáu, *del'abogáu, *per l'arena, *pel'arena, *tou l'ensame.

Cola ayuda de

Coneyería d'Educación y Cultura

Espaciu y Tiempu de la Llingua Asturiana
--Araz.net, © 2010. Tolos derechos reservaos.
Contador Estadistiques