Xandru Fernández: “Les nuestres instituciones frenen y frivolicen cualquier avance políticu"

"Nun descarto dalgún día escribir ensayu n'asturianu"

‘La herencia recibida’ (Lengua de Trapo y Círculo de Bellas Artes) ye la obra última de Xandru Fernández (Turón, 1970), la so segunda novela en castellanu, depués de 'El ojo vago', que tien como escenariu'l surdimientu de Podemos y la desilusión posterior, vital, personal y política d'unos protagonistes qu'habiten una "ciudá del norte" que bien podría ser Xixón, onde Fernández reside y ye profesor de Filosofía nun institutu públicu.

L’autor fala nesta entrevista con Asturies.com d’esti llibru, de la situación política y de la so decisión de nun escribir más narrativa n’asturianu, qu'anunció en 2017, nun momentu nel que yera ún de los nomes más reconocíos de la creación en llingua asturiana.

Hai más de 30 años, en 1990, qu’espublizó les sos primeres obres, cuando tenía 20 años. Siendo tan mozu y escribiendo nuna llingua minorizada, tendría unes espectatives, ilusiones y ambiciones. ¿Cuántes d’elles se cumplieron?

Ye un balance personal que seguramente tenía que facer pero tovía nun fici. Y soi una persona con mui poca memoria que nin siquiera lleva un diariu; recordar y pasar revista a dalgo tan distante nun me lo planteo más que como exerciciu estéticu. Que lu fadré, de xuru, pero entá nun toca.

Usté ye una persona que llevaba años implicada na vida social y política asturiana, y que nel 2014 decide dar el pasu de pasar al primer planu, presentándose a la secretaría xeneral de Podemos Xixón. ¿Cómo condicionó’l so pasu pela política la so actividá creativa?

La mio militancia política siempre foi, creo yo, discreta. Ésa foi la única vez que, poles circunstancies escepcionales qu'arrodiaron a l'apaición de Podemos, tuvi un poco más de visibilidá de lo que yo quixera.

Nun cuento que la mio esperiencia política me condicionare como escritor

Nun cuento qu'esa esperiencia me condicionara como escritor, más allá de percibir cómo pa ciertos medios de comunicación asturianos pasé a ser persona non grata. En cualquier casu, nada demasiao relevante.

¿Ye ‘La herencia recibida’ un productu d’esa experiencia; una forma de facer balance del momentu políticu, personal o colectivu, que s’abre col 15-M; una forma de pasar páxina o zarrar un ciclu?

'La herencia recibida' nútrese muncho de dalgunes esperiencies daquella, pero en nengún casu la concebí como un balance o un axuste de cuentes. De fechu nun cuento qu'una novela seya'l llugar óptimu pa tratar esos asuntos, sacante de pincelaes o brochazos que puedan apurrir dalgo de vivacidá a la narración.

Tres de la constitución de Podemos y fenómenos como les marees, candidatures populares, círculos…, paez que volvemos a un periodu nel qu’esi espaciu políticu reduzse y vuélvese menos relevante. ¿Cree que tamos nun momentu de desilusión y desmovilización?

Non, la derecha ta ilusionadísima y movilizadísima y el debate políticu ta per toes partes. La que ta desmotivada ye la esquierda. Y nun ye pa menos, porque la fola reaccionaria ye mui potente.

¿Qué piensa que queda de positivo, no personal y no colectivo, de tola esperiencia de la ‘nueva política’?

A lo menos valió pa poner enriba la mesa asuntos de los que nun se falaba con normalidá y pa enterrar clixés desmovilizadores. La política española ye agora muncho más interesante y diversa qu'hai quince años.

Siempre comenta que n’Asturies fai falta una dinámica política propia. ¿Tovía considera que ye posible?

Asturies lleva cuarenta años sin articular un discursu políticu acordies cola so propia constitución como comunidá autónoma. Lo que fixeron en La Rioja o en Cantabria ensin que s'abrieren los cielos ye p'Asturies un llabor titánicu. Hai yá munchos años imaxiné nun cuentu un futuru cercanu onde toles comunidaes autónomes s'independizaben d'España menos Asturies.

Les nuestres instituciones nin construyen nin proyecten; frenen y frivolicen cualquier avance políticu

Esa ye la mentalidá de les nueses instituciones, quiero dicir, de los homes y muyeres que les piloten, una manera de pensar que nun construye nin proyecta, sinón que frena y frivoliza cualquier amagu d'avance políticu.

Antón García falaba en 2012 de la so obra ‘El Príncipe Derviche’ como “un artefactu narrativu deslumbrante”, qu’ufiertaba un “verdaderu canon llingüísticu" pal asturianu lliterariu. ¿Yera usté consciente d’esi nivel después d’años d’escritura? ¿Yera l’asturianu una ferramienta que nun daba más de sí pa desendolcase como escritor?

Son pallabres mui xeneroses, éses d'Antón García. En cualquier casu, dexé d'escribir n'asturianu por motivos estrictamente personales, ye la llingua na que me sentí cómodu escribiendo venti años y nun había razón pa que dexara de ser asina. Pero cuando lo decidí yera fondamente pesimista sobre'l futuru del asturianu como llingua viva y sigo siéndolo.

Depues de la salida de ‘El ojo vago’, la so primer novela en castellanu, comentaba que l’agonía de la llingua asturiana yera una sentencia de muerte de la so obra lliteraria y por ello llegara’l momentu de desarrollar un proyectu lliterariu en castellanu. A esta obra siguiéronlu dos ensayos en castellanu y ahora esta segunda novela.

Cuando ves venir que la llingua na qu'escribes va camín de desapaecer, hai qu'aparar y reflexonar. La reflexón que yo fici foi ésa. Supongo que tamién influyó'l desenfotu colectivu d'una xeneración que nun supo construir un país de llectores.

¿Ta trabayando en dalgún proyectu nuevu?

Toi trabayando nunos cuantos, pero toi trabayando poco.

Una entruga cabera, especialmente interesante pa la xente que llee Asturies.com. ¿Vamos volver a lleer dacuando un obra nueva de Xandru Fernández n’asturianu?

Sigo pensando que non, pero por matizar: cuando decidí cambiar de llingua lliteraria pensaba y pienso como novelista y narrador. Nun descarto dalgún día escribir ensayu n'asturianu, cosa que nun fici nunca. Y quién quita, al meyor hasta vuelvo a escribir poesía, anque nun creo.