Pablo Pérez: ‘Llariegu 100% Directo’ ye una apuesta grande de nueso, tanto a nivel músical como téunicu’

El 27 d’abril, la Banda de Gaites Llariegu, de Sariegu, dirixida por Pablo Pérez Fernández (Sariegu, 1985), celebró’l so quince aniversariu con una actuación especial na Llaboral que se grabó pa la edición d’un CD-DVD. Ésti ta cerca de ver la lluz.

¿Cuándo vamos poder esfrutar de ‘Llariegu 100% Directo’?
 
Depués de munchu trabayu y esfuerzu, yá va quedando menos p’asoleyalu. Si nun hai novedaes, tará a la venta sobre la tercera selmana del mes d’avientu.
 
¿Qué conteníos va tener esti trabayu?
 
Trátase de un CD-DVD. El DVD consta de tres apartaos, que son el conciertu completu fechu nel Teatru de la Llaboral, el ‘making-of’ de cómo se creó too poco a poco y un ‘book’ fotográficu con una pila de semeyes del espectáculu. El CD lleva doce de los temes grabaos en direutu na Llaboral.
 
¿Cómo foi esi espectáculu entamáu por Llariegu?
 
L’espectáculu tuvo llugar el 27 d´abril d´esti añu. Intentamos mostrar al públicu dalgo que va un poco más allá de lo convencional, poniendo sobre l’escenariu un espectáculu novedosu y diferente, con una puesta n’escena cuidada y minuciosa y un despliegue téunicu ensin precedentes. Tool conteníu grabóse en direutu, tanto en formatu d’audiu como en formatu de videu n´alta definición, fechu que, como dixi, nun tien precedente n´Asturies. Son catorce temes con una duración de dos hores y venti minutos.
 
Xunto cola banda acompañáronnos ocho músicos de gran reconocimientu como son Javi Rubio (teclaos y pianu), que ye’l productor musical del discu, Jorge Cambareli (batería), Alberto Rionda (guitarra), David Adeva (baxu), Orestes Barbachán (percusiones), Miguel Herrero (trompeta), Tino Cuesta (saxofón) y Julio Gómez (trombón). Amás, tuvimos la suerte de disfrutar d’unes collaboraciones de luxu, como Kepa Junkera, Santi Caleya, Manuel Durán, René Palacio. Dark la eMe, Laura Ruiz, Guadalupe Villanueva, Guéna Lamour, Héctor Braga, Alain Fernández, la Banda Gaites Noega y cinco pareyes de baille formaes por Pablo y Raquel, Isaac y Carmen, David y María, Andrés y Fani, y Irene y Rubén.
 
¿Resultó difícil axuntar a tal cantidá d’artistes de renome?
 
Sí foi bastante difícil coordinar a tanta xente de llugares tan dispares, pero la verdá que too simplificóse gracies al trabayu grandísimu de tol mundo y a la tremenda implicación que caún d’ellos mostró n´esti proyeutu.
 
¿Qué reportoriu utilizaron nel espectáculu?
 
Nel repertoriu quiximos qu’hubiera un poco de too. Hai temes tradicionales, composiciones propies y tamién un chisgu a la música bretona, yá que ye una música que nos presta muncho tocar. Y sobre too, lo que sí se pue ver ye una gran variedá d’estilos musicales y de fusión, yá qu’a lo llargo del espectáculu podemos atopar rock, reggae, ska, salsa, merengue y inclusive música clásica al acompañanos de pianu y violonchelu.
 
Esti trabayu coincide col 15 aniversariu de la Banda Gaites Llariegu. ¿Cómo foron los sos anicios?
 
La Banda Gaites Llariegu nació nel añu 1996 y dende entós tuvo una evolución constante. Poco a poco, pero siempre incorporando coses o intentando ameyorar les que yá tenemos. Evolucionóse en repertoriu, vistimienta y instrumentación, hasta llegar a estos años últimos, nos que yá nos propusimos fusionar la gaita y la música asturiana con otros estilos como el reggae, el funky, la salsa, el merengue o el pop, ente otros.
 
¿Qué vestuariu lleven nes sos actuaciones?
 
Ye’l traxe tradicional asturianu de la zona centru.
 
Na so trayeutoria, Llariegu algamó dellos premios. ¿Cuál recuerda con más cariñu?
 
A lo llargo de la so historia, Llariegu algamó numberosos premios ente los que se pueden destacar el premiu a la Meyor Banda d´Asturies nos años 2001 y 2002; el premiu a la Meyor Seición de Percusión nel segundu y tercer Campeonatu Nacional de Bandes de Gaites Asturianes, nos años 2002 y 2003; y el más recién, que foi’l primer puestu nel Troféu Internacional Guinness de Percusión nel Festival Intercélticu de Lorient.
 
Con cariñu recuérdense toos, dende los de casa hasta los de fuera, yá que siempre ye una allegría recibir un reconocimientu d´esti tipu. Sí que tenemos un gran recuerdu del algamáu en Lorient, pue que por ser l’últimu y tamién por ser la primera banda de gaites asturiana en conseguilu. Fíxonos muncha ilusión.
 
Tamién hubo munchos viaxes. ¿Quédavos dalgún sitiu onde tocar?
 
Sí, siempre queden un montón de sitios. Agora ta más complicao viaxar, yá que les obligaciones llaborales de los componentes llenden más esa posibilidá, pero caún de los viaxes fechos foi una esperiencia prestosa y, sobre too, una forma indiscutible de conocer otres cultures, otros estilos de vida y otres formes diferentes de ver y vivir la música.
 
¿Cuánta xente compón la banda anguaño?
 
Somos 19 componentes ente gaites, bombardes y percusión, qu’inclúi caxes d’alta tensión, bombu, timbales y timbalera múltiple.
 

Tamién tienen una cantera importante.
 
Ehí entra en xuegu l’Aula de Música Tradicional Llariegu, nel que s’imparten clases de gaita asturiana, tambor tradicional, percusión, llinguaxe musical y folclor asturianu. Ye, ensin dulda, dalgo que nos sirve pa poder tener un numberosu grupu de xente interesáu na música y que, amás, mantién el funcionamientu de la banda durante tantos años.
 
¿Tien futuru la gaita y la música tradicional n’Asturies?
 
Na mio opinión, sí. Son un instrumentu y un tipu de música que gusta, que ta mui enraigonáu y que, perriba too, ta mui trabayáu dende toles escueles de música tradicionales qu’hai n´Asturies. Amás, dende hai unos cuantos años p´acá, tien una difusión enorme gracies al gran trabayu de les bandes de gaites y al nivel cada vegada más estraordinariu que tán teniendo toes n’Asturies.
 
¿Faen falta más ayudes públiques?
 
Nun ye que faigan falta más ayudes, ye que fai falta dalguna. Nun tenemos nenguna. Enantes recibíamos una pequeña aportación pa la escuela, pero dende hai unos dos años nun recibimos nada de nengún llau, dalgo que ye llamentable con lletres mayúscules. Ye mui triste que, pa una pequeña partida qu’había destinada a esti tipu de coleutivos que movemos un montón de xente de toles edaes, se quite de la nueche a la mañana y se queden tán tranquilos. Ye una verdadera pena qu’equí síamos tán poco reconocíos, ignoraos y, por qué nun dicilo, desprestixaos por parte de l’Alministración. Llueu sales d´Asturies y ves como la xente valora, aprecia y sabe reconocer tantu trabayu, esfuerzu y progresión musical.
 
¿Qué otros planes tien la Banda Gaites Llariegu tres la espublización del CD-DVD?
 
Pel momentu realizaremos una serie de conciertos nel primer trimestre del añu qu’entra pa presentar esti trabayu, promocionalu tolo que podamos y llevalu por dellos festivales y ciudaes que yá tán interesándose por él. Ensin dulda, ‘Llariegu 100% Directo’ ye una gran apuesta de la Banda Gaites Llariegu, tanto a nivel musical como téunicu, y vamos intentar que disfruten d’ella el mayor númberu de xente posible.