Pablo Carrera: “Duerna suena a Duerna y nun hai nengún otru grupu que s’asemeye”

Duerna convirtióse la selmana pasada nel primer grupu asturianu en ganar el Concurso Escenario Prau. Pablo Carrera González (Llaviana, 1986) ye’l gaiteru d’esta banda folk de la cuenca’l Nalón que va asoleyar el so primer discu esti mes.

¿Esperaben ganar el VI Concurso Escenario Prau?
 
Dempués de quedar en cuartu puestu l’añu pasau, ésti fuimos a por toes, magar que sabíemos que los otros dos grupos yeren mui bonos y muncho más veteranos… ¡Y si nun ganábemos tampoco yera pa tirase d’una peña abaxo nin muncho menos! Al final el xuráu optó pola novedá.
 
¿Cómo foi la final?
 
Celebróse nel teatru Casyc de Santander y a ella pasemos trés grupos. Los primeros en xubir al escenariu fueron los murcianos Lokolé; dempués, dende Cáceres, Barrunto Bellota Band; y pa finar, nosotros, Duerna. Salimos a disfrutar, como siempre, y cola responsabilidá que conlleva un conciertu habitual del grupu, dándolo too enriba l’escenariu y animando al públicu que se punxo en pie pa facer la danza.
 
¿Qué importancia tien esti concursu na escena folk?
 
La importancia del concursu dientro la escena folk tien la que caún-y quiera dar. Mientres pa unos nun dexa de ser un concursu, pa otros ye una referencia enforma importante. Cuntando que nun hai munchos concursos pa folk, como los pue haber pa otru tipu de música, trátase d’un certeme internacional mui bien reconocíu nesti campu. Fueron dellos los grupos que ganando esti concursu dempués triunfaron per toda España, pero quiciabes el que más conozamos n’Asturies seya Vallarna. Nesta edición hubo ventitrés participantes de diferentes llugares del mundu, como África, Colombia, Costa Rica, Cantabria, Murcia… Duerna nun sólo tenemos l’honor de ser el primer grupu asturianu en ganar esti concursu, sinón tamién el primeru en llegar a la final. Tenemos bien claro que non por ganar somos meyores que los demás; gustó lo que facíamos y cómo lo facíamos a una serie de persones que formaben el xurau, ensin más.
 
¿Costó llegar a la final?
 
Siempre ye un llogru y supón munchu esfuerzu el llegar a la final de cualquier concursu; pero dempués de quedar l’añu pasáu a les puertes de la final, punximos munchu más enfotu en conseguilo esta vegada. Primero mandemos p’allá la nuesa maqueta ‘Dende’l chigre’ y seleccionáronla pa la semifinal d’ente 23 grupos qu’había apuntaos. D’esa selección salieron 12 grupos que tuvieron que dir a tocar a dellos llugares de Cantabria; a nosotros tocónos Torrelavega. Y dempués de ver a esos 12 grupos en conciertu, escoyeron los trés que pasaron a la final. Daquella yá foi una allegría llegar a la final.
 
Nesta trayeutoria hasta tocar en Santander el pasáu 28 de mayu, ¿sorprendiovos dalgún grupu?
 
Tolos grupos tuvieron dalguna carauterística que nos sorprendió. Amás, de tolos grupos y de caún de los componentes siempre se tien dalgo o muncho qu’aprender. Con unos disfrutes más que con otros, pero de toos deprendes, por mínimo que seya.
 
El primer premiu consistió en 1.500 euros y na grabación d’un discu. Sicasí, Duerna ta a punto d’asoleyar el so primer trabayu. ¿Qué van facer col discu del premiu?
 
Dientro venti díes asoleyamos el nuesu primer discu y el nuesu primer videoclip. Yá sabíamos qu’había la posibilidá de ganar nesti concursu y que’l primer premiu consistía na grabación d’un discu; poro, escoyimos pal primeru unes canciones y dexemos otres na recámara pa por si acasu. ¡Tenemos repertoriu a mansalva! Rodaremos durante los conciertos d’esti branu los temes que tenemos que grabar pa llegar al estudiu con ellos más que matizaos.
 
¿Qué pues adelantanos d’esti primer trabayu d'estudiu del grupu?
 
Esti discu ye la representación d’un trabayu que se lleva faciendo dende que nació’l grupu hai trés años. Tien nueve temes nos que mecemos cantares de composición con melodíes tradicionales; amás inclúi’l videoclip ‘Fiestes de prau’. Les collaboraciones son abundantes y de lo más variao; lo mesmo Tante Blanco cola guitarra llétrica que Miguel Yofre col bandoneón o Arsenio Ruiz cola caxa escocesa, ente otros. Ye un discu producíu por nosotros mesmos y quiciabes eso-y dea un aire mui natural, mui nuestru.
 
¿El discu sigue la mesma llinia que la vuesa maqueta ‘Dende’l chigre’?
 
Va na mesma llinia, pero muncho más evolucionao. Creo que con esa maqueta llogremos dalgo perdifícil nestos tiempos: tener un estilu propiu. Duerna suena a Duerna y nun hai nengún otru grupu que s’asemeye. La nuesa intención al facer el grupu foi pasalo bien y tresmitir esa allegría al nuesu públicu, con repertoriu animáu y qu’incitase a baillar; non solo xéneros tradicionales d’Asturies, sinón tamién foranos – tango, rumba…–, respetando siempre les estructures carauterístiques de cada baille y arropándolos d’una instrumentación más “actual”, por llamalo de dalguna manera. A partir d’ehí, fuimos trabayando ya iguando los temes con más gustu, más musicalidá, garrando d’archivos diferentes les canciones y faciéndoles como más nos presta. Al final saquémos un productu col que tamos mui contentos.
 
¿Cómo definiría la música de Duerna?
 
Allegre, entretenío, fresco, novedoso, cenciello, cercano... ¡Yá nos dixeron milenta calificativos! Ye una música que llega a la xente. Amás, les novedaes peguen fuerte y la nuesa escoyeta d’instrumentos ye bien diferente al restu los grupos.
 
¿Quién forma Duerna anguaño?
 
Duerna somos los mesmos qu’hai tres años. L’añu pasáu Pablo Pérez col bouzouki formó parte del grupu, pero cola so salida decidimos que si queríemos más xente diba ser de forma contratada. Asina que’l grupu ta compuestu por Andrés Martinez, col caxón, bombu, platos y voz; Estefanía Moro, con una riestra percusiones que pa montales y desmontales fai falta una grua’l Roxu –pandereta, panderu, timbal múltiple, tambor asturianu, cencerru, castañueles, platos, charles…– y cola voz; Pedro Pablo Iglesias, cola armónica, guitarra y voz; y yo mesmu cola gaita, voz y coros. Pa dellos conciertos llevamos un formatu ampliáu onde toquen con nosotros Melanie Moers, col contrabaxu; Dani Álvarez, col bouzouki; Abraham Riego; Tante Blanco; o, inclusive, la Banda Gaites Conceyu de Llangréu.
 
Tres la espublización del discu, ¿cuáles son los oxetivos próximos de la banda?
 
Ún de los oxetivos, sobre too p’Andrés, ye tocar col Bernabéu a reventar de xente… (rises) Los oxetivos nun son otros más que gustar a la xente y que lo pasen bien, vayan onde vayan a venos presentar ésti trabayu. Una vez preparada la grabación del segundu disco gustaríanos llevar la nuesa música fuera de les fronteres d’Asturies y España.
 
¿Cómo ve la escena folk asturiana actual?
 
Na variedá ta’l gustu y anguaño hai munchos grupos distintos que puen enmarcase dientro’l folk y que nun pretenden imitar a naide, sinón que caún tien unos oxetivos propios y asina ufren al públicu una amplia gama de posibilidaes sonores.
 
¿Hai problemes nesa escena pa conseguir sitios onde tocar? Yá casi nun queden nueches celtes.
 
La verdá ye que les nueches celtes tán cayendo, pero siempre hai sitios onde tocar. Nosotros somos un grupu amoldable a too y llevamos dos años ensin parar: nueches celtes, mercaos, fiestes de prau, teatros… Pero de toes maneres nótase muncho la crisis nel aspectu musical.
 
¿Fai falta más apoyo a la música del país por parte de los medios públicos?
 
Un poco más nun mos vendría mal, pero asina y too tenemos que dar les gracies a la radio y televisión autonómiques por facer llegar, por poco que seya, la nuesa cultura a toles cases d’Asturies.
 
Pa zarrar, ¿onde vamos poder sentir la música de Duerna esti branu?
 
Lo próximo que tenemos ye en Cantabria, nel festival de Folkomillas. Y equí n’Asturies, pues les fiestes de San Pedro, en La Felguera; la presentación del discu nes fiestes de Santiago, en Sama; la nueche folk de Baíña; la nueche celta de Carrio, en Llaviana; y otres munches. La xente interesao pue entrar nel nuesu Facebook, ferramienta qu’esplotamos al máximo, pa enterase de tolos conciertos que damos.