Mapi Quintana: “El de la Llaboral de ‘Música pa tornar páxaros’ foi’l conciertu con más sentíu de la mio vida”

‘Música pa tornar páxaros’ y ‘La Maramoniz’ son los dos repertorios que foi quien a ellaborar Mapi Quintana (La Pola, 1976) cuasi al empar, dos proyeutos mui especiales pa l’artista al tar marcaos por dos persones tan importantes pa ella como Elías García y la so güela María. Inmersa na xira de Rodrigo Cuevas como parte de la banda del uvieín, nesti momentu per México, faló con Asturies.com d’estos dos trabayos que ta acabante d’autoeditar en CD.

6 d’agostu del 2022. ¿Qué supón pa vusté esa fecha?

Ye la fecha del trabayu más importante que tengo fecho: el conciertu inaugural de la programación d' Asturies nel Festival Intercélticu de Lorient.

¿Cómo foi la esperiencia d’abrir oficialmente un añu dedicaú a Asturies nun festival del tamañu del d’An Oriant?

Foi la esperiencia de xestionar munches emociones toes xuntes. La grandísima responsabilidá de ser la tarxeta presentación del to país nel festival de música de raigañu más conocíu del mundu ye un trabayu complexu qu’implica muncha organización, un equipu de 10 persones y diseñar un calendariu intensu de 7 meses. Nunca fixera un trabayu d’eses dimensiones.

Deprendí munchísimo sobre tolo que ta al rodiu de la mio profesión (la parte almisnitrativa y loxística) y muncho más sobre la mio capacidá como persona y como música. Agora echo un güeyín p'atrás y flipo: ¿Fixi yo tou eso? ¿En 7 meses? (risa).

¿Cómo surdió la posibilidá de poner en marcha esti espectáculu?

Foi l' encargu del Principáu de facer esi conciertu inaugural lo qu’echó la máquina a andar. Tenía otru espectáculu recién estrenau (La Maramoniz) y facíaseme impensable que pudiera sacar otru repertoriu enteru de siguío. Pero como aceptara l' encargu, porque esi tipu d’encargos nun se refuguen a nun ser que teas como una oveya, tenía que lu producir sí o sí. En cuantes me paré a preguntame qué tengo yo que contar a los demás vínoseme la tristura tan fondera que sentía pol fallecimientu d’Elías. Al principio paecíame mui incómodo subime a un escenariu a cantar/falar sobre esto, pero superáu esi primer momentu de mieu a incomodar, siguí p'alantre cola idea convencida del too.

Tuvo la oportunidá de llevalu a Asturies y agora, amás, treslladalu a un discu que, amás, tien un diseñu mui diferente y orixinal.

El conciertu de La Llaboral foi el conciertu onde ‘Música pa tornar páxaros’ esplegó tol su significau. Foi más potente que'l conciertu de Lorient porque’l públicu yera la xente cola que yo quería compartir esa música. Nel diseñu del discu, nos agradecimientos, menciono a tola xente que tuvo nel Teatru de La Llaboral el 3 d’avientu del 2022 porque pa min foi’l conciertu con más sentíu de la mio vida.

Amás de la música, l’espectáculu tenía un diseñu de lluces y lo más llamativo de tou, unos vídeos qu’acompañaben cada cantar. Les lletres de los cantares son importantísimes nesti repertoriu y sabiendo que'l públicu de Lorient nun diben ser al cien por cien falantes d’asturianu, había que topar la manera de que pudieren entender les hestories. Los videos que fizo la artista catalana Marina Durany tresmitiéronles con ambientes visuales o con pequeñes películes enllenes de poesía.

Marina fizo tamién el diseñu del discu. Ye una caxa onde metimos l’espectáculu con toles sos imáxenes, los sos personaxes y por supuesto la música en fomatu CD.

Al empar asoleyó otru álbum, el primeru d’un proyeutu musical que lidera. ¿Qué ye La Maramoniz?

La Maramoniz ye’l pueblu de mio güela María, ye’l nome del grupu, ye’l discu, y ye’l repertoriu que me val a min p’alcordame de mio güela (la so voz, les tardes na so cocina...) y que m’enseñó a güelita María de moza, cuando cantaba pa la danza en pueblu.

¿Qué va atopar la persona que sienta’l discu?

Son 7 cantares. Cuatro enseñómelos mio güela y tán arreglaos a la nuestra manera (esto ye, minimalismu, impresionismu, improvisación...), que son ‘Danza Pin Pin’, ‘Danza de San Cipriano’, ‘Agarrao de La Maramoniz’ y ‘Afke’, y ‘Güelita’, ésti últimu reciclau del discu ‘Severina’ de 2014. Dos son composiciones propies (‘Canuto Hevia 2’ y ‘Cantar pa durmir un ninín’) y l’otru (‘Zagaleja’) ye una melodía de Cris Zagaleja, una amiga panderetera de Valladolid, a la que-y puse un arreglu inspirau en Debussy, anque al final nun suena a Debussy (risa).

¿Ta nun momentu creativu bonu? Llama l’atención que lleguen dos trabayos depués de tantu tiempu dende ‘Severina’.

La mio creatividá depende de les coses que me pasen. Si nun tengo nada que contar, nun tengo nada que crear.

Na so música, que bebe tanto del jazz como de la tradición, la llingua asturiana ta siempre presente.

Non siempre, tamién fago temes en castellanu y n’inglés, que son les llingües que falo más o menos bien. Depende de les hestories que quiera contar y sobre too, de quiénes son los protagonistes. Ye verdá que l’asturianu ye la llingua que más uso, básicamente porque ye la mio llingua materna.

‘Música pa tornar páxaros’ y ‘La Maramoniz’ financiáronse al traviés d’una mesma esitosa campaña de micromecenalgu na rede. ¿Siente que’l públicu valora’l so trabayu?

Sentí muchísimu apoyu profesional y personal. Cada una de les más de 200 persones qu' apurrieron perres a la campaña empericotiáronme l’ánimu no más alto. ¡Gracies un millón de veces!

Vusté tamién forma parte de la banda qu’acompaña a Rodrigo Cuevas. ¿Cómo ta siendo la esperiencia?

La esperiencia ye fantástica, bonísima. Ye un aprendizaxe diariu sobre la profesión, sobre les mios capacidaes musicales y personales. L’equipu ye xenial, perfeutamente ensambláu. Pasamos munches hores xuntos y yá son práuticamente familia pa min.

¿Qué supón pa la música tradicional asturiana el poder llegar a tantos puntos del planeta de la mano d’un artista como Cuevas?

Que la música tradicional asturiana y la llingua asturiana lleguen a tantos puntos del planeta ye de xusticia, ye lo que merez, igual que cualquier otra música tradicional de cualquier sitiu. Ye importantísimo caltener la diversidá cultural. Cada cultura que se curia y se muestra apurre riqueza al planeta y potencia l’entendimientu ente pueblos. Les consecuencies positives de que convivan miles de cultures nel planeta son estratosfériques.

Una vegada asoleyaos estos dos trabayos, ¿cuáles son los retos próximos que se marca?

Voi continuar el trabayu con La Maramoniz. ‘Música pa tornar páxaros’ yá nun lo voi facer más, tuvo’l so momentu y yá foi. Yá cumplió la so misión, que yera’l conciertu de Lorient y que yo avanzara nel mio duelu (usélo de’automusicoterapia y funcionó). Nun quita qu’en La Maramoniz rescatemos dalgunos temes que por temática o porque nos gusten mucho, cuadren nel repertoriu.

Agora toi inmersa na xira de Rodrigo Cuevas y toi feliz de poner el tiempu nello, pero quiero sacar tiempu tamién pa facer un trabayu d’oficina fuerte y poder conseguir conciertos pa La Maramoniz.