Lozano: “El proyeutu del Ciares pretende recuperar los valores tradicionales del fútbol”

‘Esto ye La Cruz’ reza un lletreru a la entrada del campu del UC Ciares. Un cartelu simple que diz muncho del espíritu que quier implantar la direutiva entrante d'esti club xixonés de Tercera. El so secretariu, Miguel Lozano Blázquez (Xixón, 1967), faló con Asturies.com sobre esti proyeutu que refuga’l "fútbol modernu".

Cuerren aires nuevos per La Cruz.
 
Sí, cuerren tiempos nuevos pal Ciares. Garramos la direutiva una xente que, de primeres, nun tábemos venceyaos al mundu del fútbol a esti nivel y tamos consiguiendo facer dalgo diferente dientro del fútbol modestu nesta ciudá, inclusive tamién n’Asturies y n’España.
 
¿Cómo decidieron garrar les riendes d’esti club xixonés históricu?
 
El club taba cerca del so desaniciu porque la direutiva anterior yá taba cansada y nun quería siguir; y naide venceyáu a esa direutiva nin naide cercanu al club quería garrar les riendes del Ciares. La única alternativa qu’había pa evitar la desapaición yera la fusión con otru equipu pa compartir esfuercios, tando’l Manuel Rubio o’l Llano 2000 como posibilidaes. Entós comentaron-y a Roberto Colunga, xugador per munchos años del Ciares y entrenador depués de dellos equipos como’l Manuel Rubio, el Norte Astur o l’Arenal que siguía siendo sociu del club, si quería facese cargu del Ciares. De primeres, paeció-y un proyeutu mui grande pa llevalu solu y comentó-ylo a xente que tamién yera aficionao al Ciares y a xente del barriu. Yo, por exemplu, venía de guaḥe col mio pa a La Cruz y, llueu, cuando principiaron a xugar Roberto y Avelino, de La Folixa, torné otra vuelta a dir al campu, polo que dixóme si quería participar nel proyeutu, al igual que fixo con otres persones del círculu nuesu que tenía dalguna vinculación col Ciares. Al final, decidímonos a dar el pasu.
 
¿Cuánte xente conforma la direutiva?
 
Somos una docena de persones, pero xente que trabaye ‘full time’, unes diez. El presidente ye Alberto Álvarez García, sociu más antiguu de la direutiva xunto con Roberto. Decidimos qu’él fora’l presidente por ser el que más vinculación tenía col club, yá que’l comerciu del so pá, AGRISA Coses pa la güerta, foi de siempre collaborador del Ciares.
 
¿Qué tal ta siendo la esperiencia?
 
Mui guapa, pero al mesmu tiempu complicada. Tar al mandu del Ciares quitónos vacaciones, dineru y tiempu. Llevar un club requier muncha dedicación, pero tamos satisfechos colos resultaos.
 
La Cruz ta viviendo unes entraes perbones nes primeres xornaes de lliga.
 
Tamos doblando l’asistencia del públicu con respeuto al añu pasáu, cuando la entrada media nos partíos yera de 80-100 persones. Esti añu tamos metiendo en tolos partíos más de 200 y, en númberu de socios triplicamos la cantidá: de poco más de 100 qu’había renovamos a 70 y sumamos 300 nuevos, cola salvedá de que fiximos abonaos simpatizantes que tienen derechu a presenciar cuatro partíos y descuentos nel material del club, a los que contamos tamién como socios. D’igual forma, creamos categoríes nueves, ente les que ta la de paráu, con rebaxa sobre’l preciu d’adultu o sub-30. Sacamos poco más dineru, pero conseguimos tener un ambiente perbonu en La Cruz.
 
Nel aspeutu del públicu, la cosa va bien; y tamién no que ye la repercusión mediática, porque ta escribiéndonos xente d’Alemaña, Inglaterra y d’otros munchos llaos pa pedir información, inclusive camisetes. Nesi sen, el proyeutu ta funcionando; non tanto a nivel deportivu, pero col pasu del tiempu esperamos que se vaya meyorando.
 
Gran parte de culpa d’esi ésitu que comenta ye la filosofía que pretenden implantar nel Ciares.
 
Sí, ye una filosofía que s’enmarca dientro d’un movimientu mundial en pro de la recuperación de los valores tradicionales del fútbol y en contra de too no que se convirtió agora esti deporte: espectáculu, negociu… Lo que ye verdá yera’l fútbol d’enantes, dalgo social pa que la xente se vinculara ente sí, xente del barriu… Eso ye lo que queremos recuperar y qué meyor que facelo desde dientro d’un equipu de fútbol. Ye dalgo que nós, enantes de garrar al Ciares, yá tabemos faciendo dende fancines, blogues, etc.
 
¿Hai esperencies paecíes a la vuesa?
 
N’otros países, sí. N’Inglaterra ta la más conocida, la del FC United of Manchester, equipu fundáu por aficionaos tres la venta del Manchester United a unos empresarios estranxeros. Esta esperiencia tuvo muncha repercusión ente aficionaos d’otros equipos d’Inglaterra y, inclusive, n’Italia hai dalgún club que sigue esa filosofía. N’España, nós somos pioneros xunto col Ciudad de Murcia, equipu que diba a desapaecer y que garraron los sos siguidores, implantando lo que denominen un ‘Club d’Aicionaráu Popular’ (CAP), figura creada pa que l’equipu lu lleven los propios aficionaos.
 
Nos equipos aficionaos nun se nota tanto la diferencia como nos equipos profesionales; la mayoría de los direutivos de los clubes modestos son aficionaos, anque nun son aficionaos de base, como lo somos nosotros. Nel Ciares, los direutivos nos ponemos cola afición y llevamos la camiseta del equipu. Prentendemos eso mesmo, que los aficionaos lleven les riendes del equipu.
 
¿Qué tal recibimientu tuvo’l vuesu proyeutu n’otros clubes de la categoría?
 
Al principio estrañaba un poco. Cuando diba a les reuniones de los clubes na Federación, o cuando diba pola propia Federación, estrañábénse y rínse, pero tamién taben admiraos de qu’hubiere xente mozo que quisiera ser direutivu d’un club; decíenme ‘nun sabes ónde te metistes’. Lo que más valor tien agora nel fútbol ye’l direutivu, una persona que trabaya, pon dineru, nun cobra y namái se lleva disgustos. Como vieron que nós yeramos xente que quería llevar un club porque naide quería dirixilu, recibiéronnos perbien.
 
¿Y ente la xente que lleva tola vida apoyando al Ciares?
 
Ta mui ilusionao al ver que l’equipu nun desapaeció. Amás, foron ellos los que nos pusieron al frente del club. Na asamblea de socios na que presentamos el nuesu proyeutu, na que tamién se voto’l que patrocinaba’l que yera conceyal de Deportes, José Ramón Tuero, consistente en que la delda del club, que tampoco nun yera muncha, asumíala l’Ayuntamientu si nos fusionabamos col Manuel Rubio o Llano 2000. Ello diba xunío a utilizar el campu La Cruz p’ampliar Los Pericones, polo que l’apoyu que recibimos de los socios foi unánime.
 
Esti mes, La Cruz acoyó la celebración de les I Xornaes por un Fútbol Social y Críticu. ¿Cómo surdió la idea?
 
La idea foi d’Iñigo, responsable del blogue ‘Los ideales del gol’, y, tres comentámelo, entamamos a trabayar nella. Planteóse en dos aspeutos: ún de fútbol críticu, esto ye, una crítica al modelo de fútbol profesional que ta estableciéndose dende les sociedaes anónimes deportives, y les respuestes que se pueden facer a esti modelu, como’l nuestru, el del Ciudad de Murcia o’l de los aficionaos críticos del Atlético Madrid; y otra sobre la vinculación que tenía’l fútbol cola cultura, pa finar col mitu de que la xente aficionao al fútbol ye un poco babayo y inorante. Asina, quiximos demostrar qu’hai muncha xente venceyao a la cultura popular a la que-y gusta’l fútbol, pa lo que convidamos a cinco persones que, caún nel so aspeutu, son xente mui prestixoso dientro de la cultura: Maxi Rodríguez, Boni Pérez, Carlos Marañón, Miguel Barrero y David Artime.
 
Ente les trés esperiencies de fútbol críticu que tuvieron güecu nes xornaes, quiciabes la más novedosa ye la del CAP Ciudad de Murcia.
 
Ye un proyeutu que nació a imaxe y asemeyanza al FC United. Enantes de que desapaeciera’l club, los aficionaos garraron el nome y l’escudu de la entidá y fixeron una especie de cooperativa –anque ésta tampoco ye una definición correuta– na que cada sociu tien una parte del club equitativa –una persona, una aición– y comprométese a facer dalgo nel club. Ye una manera mui democrática de llevar un club que pudieron facer ellos al fundalu dende cero baxo la denominación antigua del Ciudad de Murcia. Llueu ta la opción de nueso de mantener el funcionamientu normal d’un club de tola vida dando-y un xiru nuevu. Digamos que son les dos formes de democratizar el funcionamientu d’un club. Llueu ta’l modelu del Atlético de Madrid por enfrentamientu a la xestión de la familia Gil: munchos socios, ensin dexar de selo, decidieron fundar un club que tien equipos compitiendo en categoríes inferiores baxo’l nome d’Atlético de Madrid Socios. Ensin dexar de ser aficionaos del club, fixeron equipos suyos pa demostrar que’l sentimientu del Atlético nun pertenez a la xente que tenía les riendes de la entidá. L’aficionáu español ye menos críticu que n’otros sitios, como pue ser Inglaterra, y lo normal ye qu’hubiese esperiencies similares a les del FC United en munchos sitios onde persones de duldosa honradez fixéronse col control de los equipos.
 
Tamién hubo un güecu pa un conciertu de xente bien conocío na escena asturiana dientro de les xornaes. ¿Qué importancia tien la música nel vuesu proyeutu?
 
Muncha, porque la xénesis de por qué tamos metíos nesti proyeutu ye por afinidaes musicales. Salvo Berto y yo, el resto empezamos a venir a La Cruz porque dos xugadores del Ciares, Roberto y Avelino, yeren los que llevaben el bar musical onde parábemos, La Folixa. Unos tuvieron grupos, otros fancines, otros pincharon… Esta rellación cola música pue vese nos partíos, yá que por megafonía ponemos música que nos gusta y que ta venceyada col fútbol: dende’l punk hast’l rock&roll, pasando pol soul o la música xamaicana. Equí’l fútbol vívese d’una manera más primaria, mentes que’l fútbol inglés, el que más nos presta, ta mui venceyáu a la música. Grupos importantes como Rod Stewart, The Slade, New Order, Oasis..., integrantes de cualisquier banda de renome, son aficionaos al fútbol o inclusive lleven equipos, dalgo qu’equí pue resultar llamativo.  
 
Ta nidio que quién manda agora nel fútbol son les televisiones, como se demuestra colos horarios nuevos de los partíos de Primera División. ¿Cómo vos afeuten? ¿Va haber fuelga nel fútbol modestu?
 
Nós tuvimos d’alcuerdu en facer la fuelga dende’l primer momentu. La intención de los equipos asturianos yera la d’apoyar el parón, a esceición de los filiales o dalgún equipu que funciona d’otra manera como l’Avilés, pero creo qu’al final echóse too p’atrás pola intención d’entamar la fuelga de manera conxunta con otres territoriales. Dame la impresión de que munches echáronse p’atrás; si non, la lliga nun taba xugándose, porque poniendo partíos a les 12 la mañana y a les 4 la tarde tas quitando los marxes únicos que teníen los clubes modestos pa xugar ensin la competencia de les teles. Nós nun lo notamos muncho porque a l’aficionáu tipu que tenemos da-y igual que televisen un Osasuna-Zaragoza na tele, pero a otros equipos un partíu televisáu a la mesma hora quita-y xente nel campu.
 
Al respeuto, planteóse que la Lliga de Fútbol Profesional (LFP) y les televisiones dieran una contraprestación a los clubes por estos horarios, pero tampoco ye la solución porque nun solo nos maten a nós; a la llarga tamién maten al fútbol. Los clubes profesionales tán sacando dineru agora colos contratos televisivos pero nun se tán dando cuenta de que tán vaciando los campos. Salió l’otru día una estadística que diz qu’esti añu ta diendo un 25 por cientu menos d’aficionaos en Primera División que l’añu pasáu; esta burbuya va españar y, cuando pase, la xente nun va volver a los campos.  
 
Nel terrén deportivu, ¿cuál ye l’oxetivu del Ciares pa esta temporada?
 
La permanencia y más agora, porque tuvimos mui mala suerte nesti entamu de la campaña. Lesionáronse de sópitu seis xugadores en puestos claves como la defensa y la delantera, polo que tuvimos que presentanos al primer partíu de lliga con 13 futbolistes –a dos d’ellos tramitándo-yos la ficha a última hora–. Pese a tener munches baxes, plantamos-y cara na segunda xornada al UP Llangréu y pudimos gana-yos de nun ser pol árbitru. Depués, nel restu del partíu, perdimos siempre pola mínima a esceición del empate del domingu pasáu en La Cruz col Lealtad. Hai que tener en cuenta que somos l’equipu col segundu presupuestu más baxu de la categoría depués del Cualloto, polo que lo normal ye qu’ocuparamos una de les dos places últimes. Sicasí, creo que tenemos equipu pa salvanos.
 
Ún de los detalles que más llama l’atención al ver xugar al Ciares ye que la camiseta lleva la publicidá institucional de Xixón col topónimu tradicional.
 
El conveniu que tien l’Ayuntamientu con tolos equipos de Xixón ye a cambiu de publicidá de ‘Gijón’ na camiseta y de ‘Xixón’ nel pantalón. Nós, como toos tenemos simpatía pola causa de la oficialidá del asturianu, planteamos al Ayuntamientu la posibilidá de llevar ‘Xixón’ tamién na camiseta, pa lo que nun punxeron nengún problema nin esti conceyal de Deportes nin l’anterior. Na cartelería tamién utilizamos muncho’l topónimu tradicional del barriu y de la ciudá. Sobre la posibilidá de cambiar el nome del equipu p’asturianizalu, tuvimos mirándolo pero ye daqué mui llaborioso’l camudar los estatutos.