Cova Tomé: “Si queremos que cambien coses y avanzar, esti barcu necesita otra tripulación”

|
Cova Tomé

Cova Tomé (Ḷḷuarca, 1970) ye la candidata de Podemos a la presidencia d’Asturies, pero tamién la cabeza visible d’un equipu de trabayu más ampliu conformáu por Xune Elipe y Laura Tuero, númberos 2 y 3 de la llista. Los trés tán poniendo tol so enfotu pa llevar a la ciudadanía la propuesta del partíu pa tresformar Asturies.

¿Cómo ta diendo la campaña eleutoral?

Intensa. Vertixinosa. Pero mui caldia y participativa, con voluntarios poniendo manes y corazón y con alcuentros bien prestosos cola xente.

¿Ye optimista de cara al 28-M?

Soi optimista por naturaleza, de les que ponen al mal tiempu bona cara.

Convocatoria por Asturies vien declarando la so intención d’entrar nel Gobiernu próximu d’Asturies. ¿Qué fadría Podemos de dase lo númberos?

En cualesquier circunstancia Podemos Asturies va trabayar nun Gobiernu de derechos que s’ocupe de les coses importantes: emplegu, vivienda, salú, cuidaos… Esto nun va d’ocupar puestos, va de ser responsables y avanzar con valentía.

¿Qué cambios urxentes necesita Asturies pa tresformala?

Reformar el nuesu Estatutu d’Autonomía pa ganar competencies, recuperar dignidá y blindar derechos. Mui urxente ye actuar en salú mental; mui urxentes son los cuidaos a la dependencia; mui urxente ye l’emplegu y la vivienda.

Pola so profesión ye bien conocedora de la situación de la Sanidá asturiana. ¿En qué hai qu’ameyorar?

En trés coses sobre manera: la reconstrucción de l’Atención Primaria, la reducción de les llistes d’espera y l’atención a la salú mental.

L’apuesta pol asturianu y el gallego-asturiano de Podemos ye clara. ¿Ye necesario actuar con urxencia p’asegurar la sobrevivencia del idioma?

Lleva siendo urxente dende que nos constituyimos en comunidá autónoma, pero los partíos mayoritarios qu’hasta agora xestionaron tanto la Xunta Xeneral como’l Gobiernu asturianu nun-y dieron importancia. Depués del intentu fallíu de reforma del Estatutu nesta llexislatura, na que la derecha mostróse inmovilista, Foro tuviera una actitú irresponsable al venceyar la fiscalidá con ello y la FSA-PSOE xugara al posturéu, darréu toca abordar esti tema con seriedá.

Mientres llega la reforma estatutaria pueden entamase munches acciones, ente elles, l'aprobación del Conveniu Marcu de la RTPA que fixe los porcentaxes y el tratamientu del asturianu y el gallegu-asturianu nel ente públicu de comunicación, la recuperación del programa pilotu como llingües vehiculares na enseñanza, una política de normalización muncho más allá de la convocatoria de los premios lliterarios, campañes de sensibilización tresversales y efectives... Remítome a la Carta de Compromisos Llingüísticos que robló Xune Elipe.

Una voz conocida y respetada nel asturianismu que va como númberu 2 na so llista. ¿Qué papel pue xugar como diputáu na Xunta Xeneral?

Xune Elipe va ser la persona que meyor represente na Xunta Xeneral la llucha pola oficialidá; lleva cuarenta años nella, na primer llinia. Préstame muncho pensar que la persona que menos quier ver VOX na Xunta defendiendo l’asturianu ye Xune Elipe. Vamos ver nerviosos a los de Santiago Abascal.

¿Hai futuru pa vivir y trabayar n’Asturies?

Mientres sigan gobernando los que falaben de ‘lleendes urbanes’ cuando la nuesa mocedá marchaba fuera pa trabayar, y de ‘falancies’ sobre l’estáu de la sanidá pública con 5.000 persones na cai, pocu futuru va haber. Si queremos que cambien coses, qu’haya emplegu dignu, vivienda algamadiza, salú y cuidaos hai que ser quien a cambiar coses y avanzar. Y pa eso esti barcu necesita otra tripulación.

Semeya obra d'Iván G. Fernández.

Contador Estadistiques