Chechu Rubiera: “El deporte ye un referente de valores humanos y debe potenciase”

Tres 16 años como profesional, José Luis ‘Chechu’ Rubiera (Valdornón, 1973) tien la ilusión de tresmitir la so esperiencia sobre la bicicleta a los ciclistes mozos asturianos. Agora desempeña’l cargu de seleicionador xuvenil.
 

¿Qué tal lleva’l pasu de la bicicleta a la formación de los ciclistes mozos?
Mui bien, porque me permite tar más tiempu en casa cola familia. Toi encantáu. Ye cierto qu’hai vegaes nes qu’eches de menos la competición, l’ambiente de les carreres, pero en xeneral, cuando pongo na balanza el tar rodeáu de la xente que quiero, compensa munchísimo.
 
¿Nun-y da dalgo d’envidia ver pela televisión les primeres carreres de la temporada?
Un poco porque ves a compañeros y conocíos corriendo. Foron 16 años y siempre queda un bon recuerdu y dalgo d’añanza, pero toi encantáu de tar en casa.
 
Agora ta desempeñando’l papel de téunicu de la Federación de Ciclismu d’Asturies ¿Cómo surdió la posibilidá d’entrenar la cantera?
Propúnxomelo Junquera, el presidente de la Federación, y a mí apetecíame muncho trabayar colos chavalinos, cola cantera. Nun tuve que pensalo demasiao, anque tampoco sé mui bien el tiempu que voi tener pa echar una mano, yá que tamién ta la familia y ye posible que pronto comience a trabayar a media xornada peles mañanes. Lo que tengo claro ye que, si tengo dalgo de tiempu llibre, voi dedicalo a trabayar cola cantera.
 
La selmana pasada foi’l so primer contautu colos chavales.
Sí, fiximos una concentración con tolos xuveniles qu’hai n’Asturies y quedó mui guapo. Dimos unes charres de medicina deportiva y delles coses más que prestaron muncho a los chavales.
 
¿Cómo ye’l panorama actual de la cantera asturiana?
Tenemos un problema y ésti ye qu’hai mui pocos n’edá xuvenil; namái 27. Cuando hai cantidá ye más fácil qu’haya calidá, pero lo que sí ye verdá ye qu’hai tres o cuatro chavalinos qu’apunten maneres y que, si tienen suerte, serán bonos amateurs. Ye onde tenemos que mirar, porque queda munchísimo pa falar agora de si tenemos equí un futuru campeón.
 
Llama l’atención de que cola cantidá de bonos ciclistes profesionales asturianos que tenemos haya esti baxo númberu de ciclistes mozos.
Nun ye dalgo que pase namás n’Asturies, tamién asocede n’otres federaciones y n’otros deportes. Hai mui poca xente que tenga ganes de sufrir y sacrificase enriba la bici o nuna pista d’atletismu. Baxó’l númberu de llicencies en toles categoríes y en toles federaciones. Esto vien un poco acorde col estilu de vida nuevu. Somos munchos más cómodos, tenemos munchísimes más facilidaes a la hora de desplazanos y un abanicu más ampliu de posibilidaes d’ociu. Igual la crisis nos devuelve a la realidá, la xente se da cuenta de que les coses nun se consiguien fácilmente y vuelve a surdir la capacidá de sacrificiu que tienen los ciclistes y qu’antes yera más habitual. Tol mundu sabía que pa conseguir coses había que trabayales y la crisis igual nos devuelve a la realidá.
 
¿Tien muncha culpa d’ello la televisión y los valores que tresmite?
La tele ye un referente, por desgracia, patéticu. Préndesla y son too programes del corazón, Gran Hermano y telebasoria. Esi nun ye l’exemplu que debemos dar a los más mozos. El deporte sí que ye un referente de valores humanos y debe de potenciase les escueles deportives, como la Escuela de Ciclismu de Les Mestes, de les que ye posible que nun salgan campeones, pero sí xente con valores.
 
¿Qué apurre'l ciclismu a la xente mozo?
Munchos beneficios, a cualquier edá. Nel casu del ciclismu puedes empezar a correr con seis años porque la cuestión nun ye dar importancia a la competición o a los entrenamientos. Nun se trata d’intentar profesionalizalos dende pequeños. El trabayu más específicu en cuanto a entrenamientos y alimentación hai que facelo a edaes mayores: a los 14, 15 o 16 años. El correr en bici te crea unos hábitos que suelen durar el resto de la vida: l’afición al deporte y a la práutica deportiva’l fin de selmana, hábitos na alimentación, nel descansu… Lo que denominamos l’entrenamientu invisible.
 
¿Cuál ye’l tol llabor na Federación de Ciclismu d’Asturies?
Escoyer a los meyores pa participar nel campeonatu d’España, pero yo nun quiero dedicame namái a eso. Pensé que yera una bona idega reunilos a toos, qu’al ser pocos ye dalgo posible, y da-yos unes charres de medicina deportiva, mecánica, seguridá vial… Un montón de coses que creo que puede ayudalos a formase y a tener tamién más información, lo que va ayudalos a entrenar meyor y a ser meyores ciclistes.
 
¿Tamos agora nel meyor momentu del ciclismu asturianu na historia?
Sí. Los resultaos en profesionales son tremendos. Hai munchísimos ciclistes profesionales y de muncho nivel, anque tamién ye cierto que viendo’l panorama de cadetes y xuveniles, dientro d’unos años habrá una sequía importante.
 
¿Inflúi tamién na falta de ciclistes mozos l’ausencia d’un equipu profesional n’Asturies?
Claro qu’inflúi, porque los profesionales son el reflexu. Nun hai equipos profesionales n’Asturies, pero sí munchos ciclistes profesionales a lo que ye mui fácil velos entrenar pela carretera y que son un referente pa estos críos, lo qu’ayuda muncho. Lo que sí que fai falta n’Asturies ye un equipu amateur con potencial que reúna a los meyores. Agora hai dos, pero los chavales cuando lleguen a amateur paez que prefieren marchar a clubes de fuera, con más prestixu o nivel. Nesi sen tán trabayando muncho’l Ciudad de Oviedo y el Construcciones Paulino: en meyorar y en facese colos chavales de la cantera pa que nun tengan que marchar fuera.
 
¿Ye posible n’actualidá la creación d’un equipu ciclista profesional?
Si hubiese perres…, pero ónde les vas a pidir. Agora mesmu un equipu profesional de nivel cuesta seis millones d’euros y conseguir esa cantidá nestos momentos n’Asturies ye imposible. Podría facese un equipu profesional cola metá de la plantiya asturiana y de munchísimo nivel colos Barredo, Navarro, Samuel Sánchez… Pero ye evidente que nun hai puerta a la que dir a picar y, muncho menos, por desgracia, cola fama que tien agora’l ciclismo y los problemes que provoca la crisis a les empreses.
 
¿Prestaría-y ser direutor deportivu nun futuru?
Prefiero siguir cola base porque facilita tar en casa. Si tuviera que dedicame a un equipu profesional seríen 130 díes fuera de casa y ye entrar na mesma rutina. Si fora por una necesidá, garraríame a eso y a cualisquier cosa, pero ye daqué que nun me plantego.
 
Vusté dexa atrás 16 años mui bonos.
Sí, foron 16 años con munches vivencies y esperiencies que m’arriquecieron muncho. Tuve la suerte de facer dalgo que me gustaba y encima pagábanme por facelo.
 
¿Cón que se queda de tolo que vivió?
Con too, hasta los momentos malos, de los que tamién s’aprende. Les victories, sobre manera, foron importantes, pero tamién coses que nun tienen nada que ver colos trunfos como’l fechu de tar en China, Xapón, Australia o Estaos Xuníos. Son situaciones que, más allá de lo deportivo, tengo mui presentes pola suerte que tuve de visitar esos países y conocer muncha xente gracies a la bici.
 
Faiga una escoyeta: los trunfos del Giro o la so participación importante en seis de los siete Tours ganaos por Lance Armstrong.
Quedóme coles del Giro, porque son míes, pero, al igual que dixi enantes, toes eses esperiencies enriquecen: el tar con Armstrong nel Tour, viaxar con él nun avión priváu, conocer a xente como Sheryl Crow o Arnold Schwarzenegger…, son coses a les que tampoco arrenunciaría.
 
Chechu Rubiera yá ye historia viva del ciclismu asturianu. Inclusive hai una cima, el Cotobello, que lleva’l so nome.
Sí, hai una montaña ehí que lleva’l mio nome gracies a l’amistá que tengo cola xente que fai cicloturismu nel conceyu d’Ayer. Esta xente propunxo da-y el mio nome a la cima, dalgo de lo que toi mui agradecíu.
 
¿Ye un casu únicu nel mundu?
Nun lo sé. N’Asturies sí que ye la única que tien un nome d'un ciclista, pero, por exemplu, Samuel tien una cai… Los ciclistes asturianos contamos cola suerte de tener el reconocimientu de vecinos y collacios. Equí hai muncha afición al ciclismo y creo que los ciclistes profesionales asturianos somos mui cercanos, lo que la xente agradez.
 
¿Vuelta, Giro o Tour?
Pa correr, el Giro. Ye una carrera que me gusta enforma. El Tour ye la más importante del mundu y hai que ponelo na balanza, pero como carrera romántica y guapa pa disfrutar, el Giro. La manera de correr de los italianos y munches coses más faenla especial.
 
La Vuelta a Asturies ta teniendo problemes pa siguir alantre. ¿Cuál ye’l so futuru?
La crisis fai que falte financiación y una vuelta son munches perres. Si quies trayer equipos bonos con corredores bonos ties qu’incentivalos económicamente y ofrecer bonos premios. Hai munchos gastos. Amás, munches empreses qu’ayuden a la Vuelta a Asturies, sofitu que ye d’agradecer porque munches lleven munchos años faciendolo, tán axustando esa ayuda en función de los ingresos económicos qu’ellos tienen, que son peores qu’enantes. Polo tanto, ye difícil mantener la Vuelta a Asturies, pero Coque y Cristina Álvarez-Mendo tán trabayando enforma pa que salga alantre. Lo importante ye que non desapaeza. Llueu yá vendrán tiempos meyores.
 
¿Fixo muncho dañu l’UCI ProTour a les carreres pequeñes?
Tien les sos ventayes y inconvenientes. Abriéronse carreres nel estranxeru que tan mui bien pa potenciar el ciclismo fuera, pero nun pue ser qu’a costa de la Vuelta a Australia, a California o a carreres en Turquía se pierda’l ciclismu que de verdá fixo historia y abrió brecha. Éstes son les carreres que tán pagando les consecuencies hasta’l puntu de desapaecer, como la Setmana Catalana. Eso ye mui triste.
 
¿Sigue saliendo a la carretera cola bicicleta?
Sí, porque me gusta y por salú. Ye mui importante pa un ciclista profesional que tuvo 16 años encima de la bici a tope, porque cortar de golpe ye dalgo que nun recomienda nengún médicu. Los cambios de sópitu nun son bonos pal organismu. Suelo salir tres díes a la selmana y facer unos 90 kilómetros. Eso nun ye nada comparao colo que facía enantes y creo que debería de facer más. Toi en munchos frentes agora mesmo.
 
Vusté ye una persona que defendió siempre la llingua asturiana. ¿Cómo ve la situación del asturianu na actualidá?
Creo que van acabar desapaeciendo munchísimes coses que nestos díes la mayoría nun sabemos lo que signifiquen y a mí dame muncha pena. Hai que promocionalo más a nivel institucional y que la xente tenga la elleición llibre d’usala o non. Debería d’haber más programes n’asturianu na televisión y na radio pa que nun se pierda. Dame muncha pena saber que pallabres que foron usaes pol mi güelu y pol mi bisagüelu yo nun sepa que signifique y vayan desapaecer. Al pasu que vamos, ye dalgo evidente qu’esto va asoceder.