Noticies a La Gueta

Xosé Ánxelu Gutiérrez Morán Premios Lliterarios

El Premiu María Josefa Canellada, el más importante de la lliteratura infantil y xuvenil en llingua asturiana, yá cuenta con ganador. Ye Xosé Anxelu Gutiérrez Morán, autor de la obra ‘Contando colos deos’, que vamos poder lleer l’añu qu’entra.

Olimpiada Escolar Urbano Rodríguez ALLA primer fase 2022

El 17 de payares va celebrase la primer fase, clasificatoria pa la final, de la Olimpiada Escolar de Redaición. Los centros que cumplen los requisitos pueden participar nesti concursu tan prestosu que l'añu pasáu contó con 120 aspirantes.

Cantar Presta Muncho 2023

Esti domingu ye’l día más esperáu del añu pa los cuasi 400 participantes de 12 colexos que participen nel programa Cantar Presta Muncho sobre música coral que cumple 10 años y entama la Oficina de Normalización Llingüística de Xixón. Celébrase nel Teatru Xovellanos el macroconciertu final, que se divide en dos sesiones.

Grupo de teatru CP Felechosa y CP Returbiu

Esti xueves celébrase en Mieres la VI Gala de Teatru Escolar n’Asturianu. Nella participen los grupos de teatru de los colexos de Felechosa y de Returbiu, ganadores nel IX Certame de Teatru Escolar de la Conseyería d’Educación, que van representar les gallardonaes ‘Esto ye mundial’ y ‘Un día de llocos’.

El Premiu a la Meyor Direición y al Meyor Vestuariu en Primaria recayó na escuela de Felechosa, dirixida por Laura Prieto. Mentes, el de Returbiu llevó’l de ‘Meyor obra’ col grupu formáu por alumnes y alumnos de quintu y sestu.

El cuerpu humanu Ḷḷena primer planu

Les neñes y neños de la Escuela Infantil El Nial, de La Pola (Ḷḷena), deprenden y refuercen les partes del cuerpu n'asturianu gracies a un xuegu qu'usa la variante llocal del idioma. El Día de la Llingua Materna recibieron la última de les entregues, la de les les piernes, qu'inclúi pieces que colocar nel todíu, la canieḷḷa o'l cadril.

El Follosu nel CP Marcelo Gago

El Colexu Públicu Marcelo Gago celebró l’Antroxu cola visita de cuatro personaxes recuperaos del Antroxu tradicional avilesín y de Les Reines del Goxu y la Faba. El Follosu foi la gran atracción ente les escolines y escolinos del centru, que disfrutaron de delles actividaes nel patiu.