Les 400 escolines y escolinos de Cantar Presta Muncho presenten el so trabayu del cursu nel xixonés Teatru Xovellanos

Esti domingu ye’l día más esperáu del añu pa los cuasi 400 participantes de 12 colexos que participen nel programa Cantar Presta Muncho sobre música coral que cumple 10 años y entama la Oficina de Normalización Llingüística de Xixón. Celébrase nel Teatru Xovellanos el macroconciertu final, que se divide en dos sesiones.

Son cantares populares y modernes les que van interpretar les doce escueles partipantes, cuatro más que nel cursu pasáu. Tolos maestros que s’encarguen d’esti llabor tienen l’asesoramientu de Nacho Fonseca, creador de Seliquín y Xentiquina, que coordina Cantar Presta Muncho.

Na sesión matutina, que va entamar al meudía, van cantar el Rey Pelayo (‘Cuando te vi na fonte’ y ‘El vieyu sultán’), el Santa Olaya (‘Pericote’ y ‘La sacavera’), Príncipe de Asturias (‘Tres fueyines, madre’ y ‘Playa’), Cabueñes (‘Vaqueira’ y ‘Nun nos gusten les lenteyes’), San Lorenzo (‘Tengo tres cabritines’ y ‘La moto Pachín’) y La Milagrosa (‘Les tos cabres, Xuan’ y ‘La fía Mon’). De tarde, dende les 17 hores, va ser el turnu del Laviada (‘Cada vez que voi a Llanes’ y ‘Rock del violinista’), Río Piles (‘Tres fueyines, madre’ y ‘Insomniu’), La Escuelona (‘Ríu Verde’ y ‘Bambi’), Tremañes (‘La polesina’ y ‘L’iviernu ta al revés’), Xovellanos (‘Si fuere mozu solteru’ y ‘Nel reinu de Neptuno’) y Clarín (‘Chalaneru’ y ‘Nun nos gusten les lenteyes’).

Toos ellos yá celebraron el mes pasáu conciertos públicos que tuvieron llugar nel Atenéu de La Calzada y nel Antiguu Institutu que sirvieron de preparación pa esta gran cita, que tien accesu llibre previa retirada d’invitación. L’oxetivu de Cantar Presta Muncho ye “averar a les escolines y escolinos del nuestru conceyu a la música coral d’una manera cenciella, abierta, activa y participativa”.