Adrián Pumares

Adrián Pumares

Poder participar, con estes pallabres, na reconocencia a Asturies.com nel so 25 aniversariu nun ye, nin muncho menos, un compromisu: ye un verdaderu arguyu. Y ye un arguyu por llevar esti mediu acompañándome dende l'adolescencia. 25 años d'andadura (y los que-y queden), que lu convierten nel mediu dixital más veteranu del Principáu d'Asturies.

Pero amás de por ser llector, siéntome honráu de participar nesta reconocencia porque creo qu'Asturies.com ye'l mediu dixital que más fixo pola llingua asturiana. Tengo meridianamente claro qu'utilizar la nuesa llingua, tamién nos medios de comunicación y na Xunta Xeneral del Principáu, ye la única forma de salvar l'idioma.

Nun quiero refugar nestes llínees l'asunción de responsabilidaes. Llega esti aniversariu, y por tantu esti artículu, nun momentu complicáu y frustrante pa los falantes d'asturianu, tres cuatro décades ensin que se reconozan los sos derechos, y tando más cerca que nunca d'algamar una Reforma del Estatutu d'Autonomía qu'incluya la reconocencia d'oficialidá pa la llingua asturiana. Nun tuvimos, yo'l primeru, al altor de lo que reclama la sociedá asturiana. Pero sí que quiero aprovechar estes llinees que me brinda'l mediu dixital que más trabaya y que más fai pola reconocencia del asturianu pa reafitar el mio compromisu con otorgar derechos a los falantes d'asturianu. La oficialidá, guste más o guste menos, ye yá imparable.

Y la reconocencia de derechos de los falantes d'asturianu ta más cerca que nunca gracies a, fundamentalmente, el llabor de medios como Asturies.com, que lleven 25 años faciendo lo que fai la inmensa mayoría la sociedá asturiana: utilizar la llingua asturiana con normalidá. Norabona, y gracies pol llabor.

 

Adrián Pumares

Secretariu xeneral de Foro Asturias

Contador Estadistiques