Saludos 25 Aniversariu

Hai venticinco años, cuando un grupu de mozos punxo en marcha la plataforma empresarial de la que surdió Asturies.com, l’asturianu daba un pasu de xigante nel procesu de normalización llingüística, metiéndonos de sópitu nel tarrén virtual y n’internet. Naquel momentu aquella vieya llingua milenaria taba esforzándose tovía por crear industries culturales alredor del llibru impresu, de los medios de comunicación editaos en soportes tradicionales, de les artes escéniques convencionales o de la música en soporte físicu. Yera tanta la novedá que los que yéramos solo un poco más mayores nin siquiera podíemos albidrar qué diba suponer nes nueses vides el mundu dixital, anque aquellos rapazos nuevos, auténticos pioneros, esforzábense por esplicanos qué yera’l www, acompañándonos naquel procesu. Ficieron por interconectar a los usuarios y usuaries, resultando ser de los primeros proveedores asturianos d’accesu a internet y proporcionando tamién les primeres cuentes de corréu electrónicu.

Venticinco años más tarde d’iniciar nel nuesu ámbitu la so revolución dixital, celebramos qu’Asturies.com sigue activa y que ye la referencia periodística n’asturianu, una plataforma atenta a cuanta información se xenera alredor de la llingua, contándonos el día a día nella. Ye nesti portal onde se puen siguir al momentu les novedaes que xenera la sociedá, con particular atención a lo que se mueve na redolada llingüística. Quien s’entretenga somorguiándose nes sos secciones va sorprendese pola cantidá y calidá qu’ofrez, dende “A la Gueta los Sueños”, con recursos pa la reciella, a “Espaciu y tiempu”, qu’apurre datos de tou tipu sobre esta llingua, hasta’l “Proyectu Caveda y Nava”, onde s’empezó a dixitalizar la lliteratura anterior a 1950. Tamién destaca’l cursu en llinia qu’ofrez, “Deprendi asturianu”, nel que miles d’usuarios dieron los primeros pasos formativos nesti idioma.

Asturies.com tien pasáu y presente. Ye mui necesario que, como la propia llingua asturiana, tenga futuru. Ye xera de la sociedá, tanto dende’l sector públicu y l’acción política que representamos nesti momentu como dende la inciativa privada, llograr que siga siendo un portal informativu vivu, una plataforma de normalización llingüística y un sitiu web de conocencia y espardimientu. Necesitamos que siga vixente’l so compromisu, verdaderu exemplu d’esfuerzu y dedicación.

 

Antón García

Direutor Xeneral de Política Llingüística

Pages