Compromisu énte'l 8-S

Yolanda Huergo's picture
Taxonomy upgrade extras: 

Esti 8 de setiembre tien pa nós daqué d'especial, porque ye'l primeru de la organización que tamos acabantes de crear, Compromisu por Asturies.

El procesu constituyente que vivimos nel últimu añu diose nun contestu social y políticu difícil que nos ta llevando a un escenariu distintu, lo que nos obliga a repensar cuála ye l’alternativa política que’l nuestru país necesita. 

No que toca al panorama políticu n’Asturies venimos d’un añu que foi convulsu no electoral; tres dos elecciones en menos d'un añu, amenaces de mociones de censura, casos de corrupción, entrada de partíos nuevos na Xunta Xeneral, y espectáculos varios poco edificantes, pero lo que tenemos delantre nun ye tan diferente de la que nos dexó Areces cuando marchó pal Senáu a reposar.

En pocos meses debatímonos ente un gobiernu asturianu desapaecíu ya inactivu en conflictos como los de la minería, y un dejá vu constante nel que'l presidente y los conseyeros aporfíen n'amosar una cara solidaria énte la crisis, pero tán consiguiendo poner d'alcuerdu a tolos sindicatos de la sanidá, cola denuncia de que tán aplicando más recortes de los qu'obliga Madrid y mientres anecien en dicir que va ser los defensores de los pegollos del estáu del bientar, la educación sufre recortes en profesoráu y medios. Y pel so llau la oposición xuega los roles de siempre repitiendo tópicos, recetes agotaes o discursos que nun tienen  en cuenta la especificidá de la crisis n’Asturies.

Pero mientres les dinámiques nel gobiernu y na Xunta Xeneral nun cambien, les coses pa la xente n'Asturies sí tán cambiando y, otra vuelta, pa peor. El datu del paru d'agostu ye 0,86% más, penriba la media l'Estáu, pero lo que ye más preocupante, nos últimos doce meses el paru n'Asturies medró en 14.570 personas, ye dicir, nun añu aumentó un 18,36%. Esti porcentaxe sitúa a Asturies como la tercera comunidá del Estáu con peor comportamientu interanual, lo que contradiz el vieyu discursu de qu’Asturies ta meyor preparada pa sobrellevar la crisis porque nun teníemos burbuya inmobiliaria, nun dependíamos del turismu y teníemos un sector industrial que nos permitía resistir meyor esti momentu tan duru nel que los intereses d’unos pocos tán condicionando les vides de la mayoría de la xente.

N'Asturies hai munches voces crítiques col modelu económicu, políticu, social, cultural, y hasta moral que nos quieren imponer, y ye’l nuestru deber confluir y participar na resistencia a esi modelu, que compartimos con otros pueblos.

Pero too ello ensin escaecer qu’Asturies necesita soluciones especifiques porque parte de los nuestros problemes tienen unes característiques especifiques. Asturies como país ta nun momentu especialmente complicáu nel que les amenaces recentralizadores pueden completar el procesu subordinador que vien careciendo Asturies a lo llargo de la democracia, porque la cultura y la llingua asturiana, y too aquello que podamos calificar como elementu identitariu que nos define como pueblu, va perdiéndose nun procesu programáu dende’l poder políticu y social, y porque la economía asturiana de los últimos 30 años taba basada nun planteamientu colonial y dependiente y nun se xeneró nenguna alternativa a la dinamitación de los nuesos sectores productivos, lo que va condergar a la emigración xeneralizada que yá sufre la nuesa mocedá.

Por eso fai falta una alternativa política nueva, asturiana, solidaria y que defenda ensin matices los intereses de la mayoría social y del país. El camín paez más llargu y difícil d'andar que nunca, sabémoslo, pero tamién ye más necesariu y inevitable, porque la situación d’Asturies y del mundu nel que vivimos esixe que cambiemos lo lo rancio polo fresco, la vergoña pol arguyu, la teoría pola práctica, la inaición pola llucha y la provincia pola nación que queremos.

Dende esta esta organización qu'esti añu cellebra'l so primer 8 setiembre, faemos polo tanto, un llamamiento a organizase, a trabayar, a salir a la cai, y a esparder la necesidá de l’alternativa. Pa ello pidimos el Compromisu activu de toes y toos.

 

Yolanda Huergo, vocera de Compromisu por Asturies

Contador Estadistiques