Yates confirma que vieno a Asturies a ganar

|
Simon Yates ganador primera etapa Vuelta a Asturies

El ciclista inglés atacó a la metá de la xubida a Carabanzo pa ganar en La Pola.

Dicía enantes de la salida'l direutor del BikeExchange-Jayco, Matt White, que veníen a Asturies a ganar y nun mintió. Simon Yates, el gran favorito d'esta edición énte l'ausencia de Nairo Quintana pola cayida sufrida nel Tour de Turquía, vención con autoridá na primera de les trés etapes de la LXIV Vuelta a Asturies-Julio Álvarez 'Mendo' y sacó una ventaya de 14 segundos al restu de competidores más la bonificación.

L'equipu UCI WorldTour australianu controló bien la carrera dende la salida n'Uviéu. Una escapada de cinco corredores, Isaac Cantón (Manuela Fundación), Xavier Cañellas (Java-Kiwi Atlántico), Peio Goikoetxea (Euskaltel-Euskadi), Tomás Contte (Aviludo-Louletano) y José María García Soriano (Hiper Electro Europa) llegó hasta La Collaona depués de que se viviera l'anéudota de la xornada con una parada obligada del pelotón nun pasu a nivel que llevó a los xueces a frenar a los d'alantre, pero en Morea quedó namái en cuatro tres quedar descolgáu Contte.

Nun dudaría muncho más la intentonta al afrontar La Cabana'l pelotón unificáu. Los movimientos pola victoria reservaríanse pal altu final, el de Carabanzo, onde Damien Howson (BikeExchange-Jayco) ganaría unos metros nes primeres ramples que llevaríen a saltar al líder de Movistar, Iván Ramiro Sosa.

Un atentu Yates nun permitiría marchar al colombianu y, col pelotón otra vegada xuntu, aprovecharía pa dar el golpe a la carrera. A metá de la xubida arrancaba, dexando a toos atrás hasta La Pola Ḷḷena, ensin problemes na baxada.

El grupu persiguidor, comandáu por Vincenzo Albanese (Eolo-Kometa), entraría a 14 segundu del inglés, primer líder de la Vuelta a Asturies 2022, que mañana va xubir L'Acebu na etapa ente Candás y Cangas del Narcea. La salida ta prevista a les 11.30 hores de Candás, col quilómetru 0 asitiáu en Prendes.

El meyor horariu previstu de llegada son les 16.24 hores y la carera va poder siguise en direutu en TPA dende les 15.57 hores.

Tercer y última etapa, el domingu

La última etapa, con final n'Uviéu na cai Uría, va celebrase'l domingu, con salida de Cangas del Narcea. El Violeo será la última oportunidá pa tratar xubir puestos na xeneral y llevar la Vuelta.

Semeya propiedá de BikeExchange-Jayco.

Contador Estadistiques